(Казан, 11 август, «Татар-информ»). Башкортстанда урман янгыннары мәйданы 4 мең гектардан да артты, торак пунктларга куркыныч янамый. Бу турыда Россия Гадәттән тыш хәлләр министрлыгының төбәк буенча Баш идарәсенә сылтама белән РИА Новости хәбәр итә. «4108,7 гектар мәйданда 24 урман янгыны дәвам итә. Шулардан 3571,7 гектар мәйданда 20 урман янгыны локализацияләнгән. 9,25 гектар мәйданда 2 янгын сүндерелгән», диелгән ведомство хәбәрендә. Билгеләп үтелгәнчә, сүндерү дәвам итә, авиаразведка үткәрелә. «Янгын китергән зыянны минимальләштерү өчен барлык кирәкле чаралар күрелә. Торак пунктларга куркыныч янамый», диелгән Россия Гадәттән тыш хәлләр министрлыгының Башкортстан буенча Баш идарәсе хәбәрендә. Ведомство мәгълүматлары буенча, янгыннарны сүндерүгә 300 берәмлек техника, 1119 коткаручы җәлеп ителгән. Моннан тыш, янгыннарны бетерүдә 500гә якын волонтер катнаша.
