შსს-მ არჩევნების მიმდინარეობისას 7 საქმის გამოძიება დაიწყო
საქართველოს შინაგან საქმეთა მინისტრის მოადგილის ნათია მეზვრიშვილის თქმით, “სულ სამართალდარღვევის 29 ფაქტი დაფიქსირდა, ამ 29 ფაქტიდან 15 ფაქტი არ დადასტურდა გადამოწმების შემდეგ ან არ გამოვლინდა სისხლის სამართლის კოდექსით გათვალისწინებული სამართალდარღვევა“.
გამოძიება დაიწყო 7 ფაქტზე. კერძოდ, მუქარის და ნივთის დაზიანების შესაძლო ფაქტებზე. გამოძიება დაიწყო სისხლის სამართლის კოდექსის შესაბამისი მუხლით. ამ 7-მა ფაქტმა მოიცვა ბათუმში, მარნეულში, სიღნაღში, კასპში, სამტრედიასა და ახალქალაქში მომხდარი ინცინდენტები.
„მარნეულში სიტყვიერი და ფიზიკური დაპირისპირების ფაქტთან დაკავშირებით, მინდა განვაცხადო, რომ იქ მყისიერად გამოცხადდენ სამართალდამცავები და ისინი ცდილობდნენ სამართალდარღვევის აღკვეთას, მაგრამ სამართალდამცავებს გაუწიეს წინააღმდეგობა, რის გამოც ისინი დააკავეს ადმინისტრაციული წესით პოლიციისთვის წინააღმდეგობის გაწევის მუხლით, დაკავებულია ორი პირი - „ნაციონალური მოძრაობის“ და „ქართული ოცნების“ თითო წევრი“.
ნათია მეზვრიშვილის თქმით, 29 ფაქტიდან, დარჩენილ 7 ფაქტთან დაკავშირებით, ამ ეტაპზე მიმდინარეობს ფაქტობრივი გარემოებების დაზუსტება. ვინაიდან შეტყობინების ინიციატორთა ნაწილი სხვადასხვა საარჩევნო უბანზე ახორციელებს სამსახურებრივ მოვალეობას, არჩევნების მიმდინარე პროცესისთვის ხელის შეშლის თავიდან ასაცილებლად, მათი გამოკითხვა და გარემოებების დაზუსტება მოხდება არჩევნების დასრულებისთანავე.
შს მინისტრის მოადგილე გამოეხმაურა მედიაში გავრცელებულ ინფორმაციას, თითქოსდა პოლიციის სპეცდანიშნულების რაზმების საარჩევნო უბნების ტერიტორიაზე მოძრაობის შესახებ.
„შინაგან საქმეთა სამინისტრომ უკვე არაერთხელ გააკეთა განცხადება, საზოგადოებრივი უსაფრთხოების დაცვის მიზნით, შესაბამისი ტექნიკით აღჭურვილი საპოლიციო ძალების მთელი ქვეყნის მასშტაბით გადანაწილების შესახებ. პოლიციის თანამშრომლები უფლებამოსილებას ახორციელებენ კანონით დასაშვებ ფარგლებში და საარჩევნო უბნებისგან კანონით დასაშვებ რადიუსში, რათა მაქსიმალურად შეეწყოს ხელი არჩევნების უსაფრთხო და მშვიდ გარემოში ჩატარებას. ამგვარი გადაადგილებები დღის განმავლობაში გაგრძელდება“,- განაცხადა ნათია მეზვრიშვილმა.