რუსეთში დააკავეს „სბერბანკის“ ვიცე-პრეზიდენტი და განათლების მინისტრის ყოფილი მოადგილე, მარინა რაკოვა
რუსეთში დააკავეს თაღლითობაში ეჭვმიტანილი „სბერბანკის“ ვიცე-პრეზიდენტი და განათლების მინისტრის ყოფილი მოადგილე, მარინა რაკოვა, რომელიც გამოძიებას ემალებოდა.
რუსეთის მედიის თანახმად, დაკავებული ყოფილი მოხელე საგამოძიებო მოქმედებების ჩასატარებლად მოსკოვის შინაგან საქმეთა მთავარ სამმართველოშია გადაყვანილი.
37 წლის მარინა რაკოვა დამაარსებელია ბავშვთა ტექნოპარკ „კვანტორიუმისა“, რომელშიც დაახლოებით 47 ათასი ბავშვი და მოზარდი ეუფლება თანამედროვე მეცნიერების ისეთ დარგებს, როგორიცაა რობოტოტექნიკა, ალტერნატიული ენერგეტიკა, სამეწარმეო დიზაინი და პროგრამირება.
გამოძიების ვერსიით, მინისტრის მოადგილედ მუშაობის დროს, რაკოვას ლობირების შედეგად განათლების განვითარების ახალი ფორმების ფონდისათვის გამოიყო საბიუჯეტო თანხა. ფონდმა გარკვეული სამუშაოების ჩატარების მიზნით დაიქირავა მოსკოვის სოციალური და ეკონომიკური მეცნიერების უმაღლესი სკოლა, რომელსაც, გამოძიების თანახმად, ორი კონტრაქტით გათვალისწინებული სამუშაოები საერთოდ არ შეუსრულებია. მაგრამ უმაღლესი სასწავლებელი აცხადებს, რომ მან პირნათლად შეასრულა კონტრაქტით გათვალისწინებული ყველა ვალდებულება.
რაკოვას მიერ სახელმწიფოსთვის მიყენებული ზარალი 50 მილიონ რუსულ რუბლად შეფასდა. მის სახლში ჩატარდა ჩხრეკა, რომლის შემდეგ რაკოვამ ტელეფონი გამორთო და ზარებს აღარ პასუხობდა. გამოძიებამ ჩათვალა, რომ რაკოვას შეეძლო არალეგალურად გადაელახა უკრაინის საზღვარი და მიმალულიყო.
საქმეზე დაკავებულია რაკოვას ორი ხელქვეითი. ყველა მათგანი ბრალდებულია განსაკუთრებით დიდი ოდენობის თანხების მითვისებაში, რაც მაქსიმალური სასჯელის სახით, 10 წლამდე პატიმრობას ითვალისწინებს.