Gyrgyz syýasatçylary, meşhur şahslar prezident Žaparowy AÝ/AR-yň saýtynyň petigini açmaga çagyrýar
Gyrgyzystanda jemgyýetçiligiň 120 görnükli wekili, ýazyjylar, aktýorlar, syýasatçylar we aktiwistler prezident Sadyr Žaparowy we ýurduň beýleki ýokary derejeli resmilerini ýerli ýagdaýda Radio Azattyk diýlip bilinýän Azat Ýewropa/Azatlyk Radiosynyň oktýabrdan bäri petikli galýan websaýtlarynyň petigini açmaga çagyrdy.
13-nji dekabrda berlen açyk hat mejlisiň başlygyna, premýer-ministre, Milli howpsuzlyk boýunça Döwlet komitetiniň başlygyna we gyrgyz jemgyýetine iberildi.
“Radio Azattygyň 70 ýyllyk taryhynda garaşsyz, özbaşdak Gyrgyzystanyň kemala gelmegi üçin, gyrgyz halkynyň arzuw eden hem-de biziň ata-babalarymyzyň Sowetler döwründe ugrunda göreşen azatlygyna ýetmek üçin, goşan goşantlary örän gymmatlydyr” diýip, hatda aýdylýar. Açyk hat ýurt ýolbaşçylaryny Radio Azattygyň işlerini dessine doly dikeltmäge çagyrýar.
Azat Ýewropa/Azatlyk Radiosy gyrgyz-täjik serhediniň dawaly böleginde bolan çaknyşyklar barasyndaky bir wideony aýyrmagy ret edensoň, gyrgyz hökümeti 26-njy oktýabrda Azattygyň gyrgyz we rus dillerindäki websaýtlaryny petiklemek barada karar kabul etdi. Gyrgyz resmileri bu wideoda täjik tarapyna artykmaçlyk berlendigini öňe sürüpdiler.