Türkmen gämisiniň Wolga derýasyny hapalaýandygy aýdylýar
26-njy dekabrda Astrahanyň Wolga derýasynda 150 inedördül metrlik ýagly örtük tapyldy diýip, "Türkmenistanyň Hronikasy" neşiri “Блокнот-Астрахань” habar saýtyna salgylanyp habar berdi.
Hapany aýyrmak üçin deňiz halas ediş gullugynyň işgärlerinden sekiz adam we ýörite enjam arassaçylyk işlerine çekildi.
Biraz soň neşir hapalanma Türkmenistanyň “Magtymguly” (TURKMENBASHY JVO 8863006) gämisiniň sebäp bolan bolmagynyň ähtimaldygyny belledi.
Rus hünärmenleri tarapyndan geçirilen barlag ýagly tegmilleriň Astrahanyň merkezi ýük portunyň suwlarynda ýerleşýän türkmen gämisinden syzan nebit önümlerine dahylly bolmagynyň mümkindigini görkezdi.
Neşir Wolga derýasynyň suwlaryndaky hapalanmanyň umumy meýdanynyň hakykatda 150 däl-de, eýsem 1632 inedördül metre barabar bolandygyny, ýagny iki kilometrden gowrak meýdany tutýandygyny, bu meseläniň häkimiýetler tarapyndan derňelýändigini habar berýär.
Türkmen häkimiýetleri mundan öň gaz ýataklaryndan syzýan zyýanly gazlar arkaly howanyň köp möçberde hapalanmagyna sebäp bolmakda tankytlanýardy.