Фәрит Мөхәммәтшин Лаеш районында «Бердәм Россия» көне»ндә катнашты
Татарстанның Лаеш районында бүген «Бердәм Россия» көне» узды. Күчмә акциядә республика Дәүләт Советы Рәисе, партиянең төбәк бүлеге секретаре Фәрит Мөхәммәтшин катнашты.
Парламент җитәкчесе Усад авылында «Сәламәт буын» күппрофильле лицее һәм Лаеш техник-икътисади техникумы эше белән танышты, шулай ук «Белогорье» яшьләр үзәгендә булды, анда Татарстан Конституциясен белүгә квиз узды. Биредә Мөхәммәтшин район яшьләре белән аралашты һәм республиканың Төп законының ничек кабул ителүе турында сөйләде.
«Без катлаулы 1990нчы елларда республиканың күп милләтле халкын берләштерә торган Татарстан Конституциясен эшли һәм кабул итә алдык. Конституция яңа заман таләпләренә җавап бирде. Бу документны кабул итеп, күп тармаклы икътисадны саклап кала алдык», - диде ул яшь активистларга.
Эш сәфәре ахырында Мөхәммәтшин Лаеш районы активы белән очрашты. «Бердәм Россия» көне»н муниципаль берәмлекләрдә уздыру күркәм традициягә әйләнде. Бүген Лаеш районында мәдәният, төзелеш һәм башка темалар буенча мәйданчыклар эшләде. Күргәннәр таң калдыра. Мин аеруча яшьләр белән җитди эшкә игътибар иттем. Махсус рәвештә яшьләр үзәге төзелгән», - диде ул.
Парламент җитәкчесе сүзләренчә, бу районда өйрәнер, тәҗрибә уртаклашыр һәм карар нәрсәләр бар. «Монда үзара тәҗрибә алмашу, практика, яшьләр һәм волонтерлар белән эш алып барыла. Бу катлаулы шартларда партия бу мәсьәләгә зур игътибар бирә», - диде ул.
Муниципалитет башлыгы һәм партиянең җирле бүлекчәсе секретаре Илдус Зарипов махсус операциягә киткән гаиләләргә ничек ярдәм итүләре турында хәбәр итте, диде Мөхәммәтшин. «Бүген безнең өчен бу мөһим мәсьәлә. Республиканың барлык муниципаль берәмлекләре «Бердәм Россия» активы берләшмәсе аша Россия Президенты Владимир Путин куйган бу бурычны хәл итүгә кушылды», - диде ул.
ТР Дәүләт Советы Рәисе сүзләренчә, Лаеш районы күп кенә күрсәткечләр буенча алдынгы муниципалитетлар рәтендә тора, мисал өчен, торак төзелеше, авыл хуҗалыгы, халыкны азык-төлек белән тәэмин итү.
«Бердәм Россия» көне» кысаларында Лаеш районында партиянең төбәк һәм җирле иҗтимагый кабул итү бүлмәсе белгечләре халыкны кабул итте, РКБ табиблары медицина тикшеренүе оештырды, мәгариф, гаилә, торак-коммуналь хуҗалык мәсьәләләре буенча түгәрәк өстәлләр һәм семинарлар оештырылган иде.