Яз башыннан Россиядә вакансияләр саны 20 процентка арткан
Яз башыннан эш бирүчеләрдән тәкъдимнәр саны 20 процентка артты, диде вице-премьер Татьяна Голикова. Шулай итеп, «Работа в России» порталында бүген 2 млн вакансия бар. Ә эшсезләр саны марттан бирле үзгәрмәгән.
«Агымдагы елның 1 мартына булган мәгълүматлар буенча, мәшгульлек үзәкләрендә 682,8 мең кеше теркәлгән, ә 19 апрельгә – 678, 2 мең кеше», - диде вице-премьер. Бу турыда «Российская газета» хәбәр итә.
Эш урыннарын саклау һәм эшсезлекне арттыруга юл куймау өчен икътисадка ярдәм итү чаралары планын гамәлгә ашыру турында искәртте ул.
Хезмәт һәм социаль яклау министры Антон Котяков сүзләренчә, бүген мәшгульлеккә ярдәм итүгә юнәлтелгән актив чаралар кабул ителә. 7 меңнән артык эш бирүче хезмәттәшлек итү өчен мәшгульлек үзәкләре базасына кертелгән, аларның 650се өчен шәхси чаралар планы эшләнгән. Анда федераль һәм төбәк ярдәм чаралары кертелгән, алар хезмәт коллективларын сакларга ярдәм итәргә тиеш.
65 төбәктә катлаулы икътисади вазгыятьтә калган компанияләргә кураторлар билгеләнгән.