Новости за 04.05.2023

د دې اوونۍ د "هارون باچا هنري ګړۍ" خپرونې مېلمه پېژندلی سندرغاړی ګودر ځاځی دی. ده له سندرغاړي جاوېد اميرخېل سره په ګډه يوه ولسي سندره ويلې او په تېر وړوکي اختر کې یې خپره کړې وه. ځاځی وايي سندره يې د ټولنيزې ميډيا له لارې زياتو خلکو ته ورسېده او هغوی خوښه کړه. طالبانو پر افغانستان تر واکمنېدو وروسته پر موسیقۍ محدودیتونه ولګول چې له کبله یې د ځاځي په ګډون یوشمېر هنرمندانو هېواد پرېښود. خو نوموړی په دې اند دی چې د موسيقۍ او سندرې مخه نه شي نيول کېدای. د ګودر ځاځي دا خبرې او د یوشمېر سندرې یې په خپرونه کې اورېدای شئ.

د خیبر پښتونخوا په مختلفو سیمو کې وروستیو بارانونو او ږلۍ د غنمو فصل او باغونو ته زیان رسولی دی. کروندګر وايي، تر پرله پسې بارانونو وروسته د غنمو په بوټو کې مرضونه هم پیدا شوي دي. اخوا باغوانان وايي، یوه میاشت مخکې بارانونو د الوچو د ونو ګلونه ودوړول چې له کبله یې د پیداوار کمېدو امکان دی. ویډیويي رپورټ.

رام کېشن وویل، کمل کېشن د مې پر لومړۍ نېټه د خپلو خویندو د ودونو لپاره د سودا اخيستو په غرض له خپل تره زوی سره يو ځای د کراچۍ ليارۍ سيمې ته روان وو چې د هغه په وينا، پولیسو په "جعلي نښته" کې وواژه.

تر دې مخکې، د مې پر دویمه نېټه د پاکستان رسنیو خبر ورکړی وو چې دواړه خواوې په ټول هېواد کې پر یوه ورځ د انتخاباتو پر کولو سلا شوې وې خو نېټه یې نه وه ټاکلې.

په پېښور کې د مې پر درېیمه د رسنیو د ازادۍ نړیوالې ورځې په مناسبت مظاهره شوې ده چې پکې یوشمېر خبریالانو د مطبوعاتو پر ستونزو خبرې وکړې. د پاکستان حکومت په تېرو وختونو کې په بیا بیا ټینګار کړی دی د رسنیو ازادۍ ته ژمن دی. ویډیويي رپورټ.

په مصر کې په وروستیو کې په نوي انداز د سېلفۍ (د خپل ځان انځور) اخیستو رجحان پیدا شوی دی. په پلازمېنه قاهره کې دوو خویندو د انځورونو مینه والو ته د سېلفیانو تالار په نوم یو پارک جوړ کړی دی. هغه تالار د خلکو د ساعت تېرۍ لپاره هم ډېر څه لري. د رویټرز اژانس له ویډیو جوړ رپورټ.