Учалы районында яшәүче ир-ат 25 ел бергә торган хатынын балта белән бәреп үтергән

Башкортстанның Учалы районында ир белән хатын арасындагы низаг җинаять белән тәмамланган. Алар 25 ел чамасы бергә яшәгән һәм ике бала тәрбияләп үстергән. Бу турыда Эчке эшләр министрлыгына сылтама белән «Башинформ» хәбәр итте.

Ведомство белешмәсе буенча, полиция хезмәткәрләре фаҗига урынына бара. Өйдә ир-ат була, ул ишекне ачудан баш тарта. Каралты-кураларны караган вакытта, полиция хезмәткәрләре җирдә кан таплары күреп ала, эзләр сарайга таба алып бара. Сарайдагы базда хатын-кыз мәете табыла.

Шул чакта өй яна башлый. Полиция хезмәткәрләре өйгә бәреп керә. Бу вакытта өйдә ир үз-үзенә кул салырга маташа торган була. Аны аңына китерәләр, урынга янгын сүндерүчеләрне чакыралар.

Якынча белешмә буенча, ир белән хатын еш талаша. Җәнҗал көнчелек аркасында килеп чыга. Бу юлы гадәти талаш хатынның үлеме белән тәмамлана. 52 яшьлек ир көнчелегенә чыдый алмыйча, 50 яшьлек хатынына берничә тапкыр пычак кадый, аннары балта ала һәм хатынның башына суга. Хатын шуннан соң үлгән булуы ихтимал. Аннары ир хатынының мәетен базга илтеп ташлый, диелә бу хәбәрдә.