Фәрит Мөхәммәтшин Әлки районында ике улын махсус операциягә озаткан ананың хәлен белде
Бүген Татарстан Дәүләт Советы Рәисе Фәрит Мөхәммәтшин һәм Дәүләт Думасы депутаты Олег Морозов республиканың Әлки районына эш сәфәре вакытында районда яшәүче Туйбикә Сыраеваның хәлен белде – аның ике улын махсус хәрби операция зонасына мобилизацияләгәннәр. Хәл белергә керүчеләр аның белән аралашты һәм бүләкләр тапшырды.
Фото: © Арина Потапова / «Татар-информ»
Туйбикә Сыраева – дүрт бала анасы, аларның берсе хәрби бурычын үтәгәндә һәлак булган. Тагын ике улын махсус хәрби операция зонасына озатканнар.
Мөхәммәтшин мобилизацияләнүчеләр гаиләсенең торак-көнкүреш шартларын бәяләде – өйдә барлык уңайлыклар да бар, йорт газ белән җылытыла. Кунаклар Туйбикә Сыраевага ил сакчылары тәрбияләгән өчен рәхмәт әйтте һәм аларның тизрәк өйгә әйләнеп кайтуларын теләде.
Хәрбиләрнең әнисе, үз чиратында, күрсәткән ярдәм һәм игътибары өчен республика җитәкчелегенә рәхмәт белдерде.
Искәртеп узабыз, Россиядә өлешчә мобилизация узган ел 21 сентябрьдән 28 октябрьгә кадәр үткәрелде. Махсус операция зонасында хезмәт итү өчен резервта торган 300 мең ир-егет җәлеп ителде.