Тәлгать хәзрәт Таҗетдин «Изге Болгар җыены»нда: Монда ниятләребезне яңартырга киләбез

Россия мөселманнары Диния нәзарәте рәисе, Баш мөфти Тәлгать хәзрәт Таҗетдин «Изге Болгар җыены»на ниятләрне яңарту өчен килүне әйтте.

«Ислам динен кабул итүнең 1100 еллыгын бәйрәм иткәннән соң, яңадан изге Болгарда җыелдык. Монда ниятләребезне яңартырга киләбез. Намаз уку алдыннан тәһарәт алабыз, чистарынабыз. Ниятләрне гамәлгә ашырыр өчен, әлбәттә, алдан тәүбә кирәк. Меңләгән кеше белән монда тәүбә кылдык, Аллаһыдан ярлыкау сорадык», – диде  ул.

Аллаһы Тәгаләдән бирелгән иң олы әманәт туган илебез, диде. 

«Аллаһы Тәгалә каршындагы гөнаһлар өчен дә күпме бәла килә. Тәүбә кылдың – Аллаһы Тәгалә гафу итә. Әмма үзебезнең арадагысы бар. Бәндә каршындагы хакыбыз бар, ул кешене ризалатмасаң, Аллаһы Тәгалә гафу итми. Аллаһыны таныган кеше кул бирешеп күреште икән, бөтен гөнаһлары, агачтан яфрак коелган кебек, коелачак», – дип сөйләде ул. 

Бердәмлекне ныгытып яшәргә насыйп булсын, дип теләде Тәлгать Таҗетдин.

«Илебез чәчәк атуга хезмәт итүчеләргә Аллаһы Тәгалә дәрт бирсен, куәт һәм ярдәмнәр насыйп итсен», – диде ул.