Казан ипподромында атчылык традицияләре буенча «Беренчеләр йолдызлыгы» фестивале узачак
29 июльдә Казан ипподромында Россиянең милли мәдәниятләре һәм атчылык традицияләре буенча уникаль «Беренчеләр йолдызлыгы» фестивале узачак. Аны Атчылыкны үстерү ассоциациясе оештыра. Фестивальнең тантаналы ачылышында Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров катнашачак. Бу хакта ТР Авыл хуҗалыгы һәм азык-төлек министрлыгы матбугат хезмәте хәбәр итә.
Чара программасында авыл хуҗалыгы продукциясе һәм Россия Федерациясе округларыннан күпмилләтле көнкүреш үрнәкләре презентациясе белән мультимәдәни «Күргәзмә-ярминкә», балалар рәсемнәре, фотосурәтләр күргәзмәсе һәм милли татар ризыкларын дегустацияләү-сату, мастер-класслар, шулай ук иҗат коллективлары чыгышлары планлаштырыла.
Атлар чабышы юлында татар токымлы атлар ярышачак. Шулай ук Татарстан-Алтай ат чабышында катнашучылар командасы белән Екатеринбургтан турыдан-туры элемтә булдыру көтелә.
Чара бәйрәм салюты белән тәмамланачак.