АКШ жана Европа майрамдан кийин COVID-19 жайылышы мүмкүн деп кооптонууда

Кошмо Штаттардын калайыгы 26-ноябрда "Ыраазылык билдирүү" күнүн белгилешти. Бул күнү алдын-ала эскертүүгө карабастан миллиондогон кишилер жакындарын куттуктоо үчүн саякатка чыгышкандыгы жакында коронавируска чалдыккандардын жаңы толкунун пайда кылышы ыктымал деген санааркоону жаратты.


Ушундай эле чочулай турган маанай Батыш Европада өкүм сүрүүдө. Мусулмандарда пайгамбар катары каралган, христиандарда кудай саналган Ыйсанын туулган күнүнө карата соода кескин жанданат, жакындардын келим-кетими көбөйөт. Бирок бул майрамга карата Европанын көп өкмөттөрү карантин шарттарын кыйла жеңилдетүүгө беленденүүдө.


Испания, Британия, Франция сыяктуу өлкөлөрдө соңку учурларда кайра киргизилген кыйла чектөөлөр майнаптуу болгондугу маалымдалды.


Орусияда коронавируска чалдыккандар кескин көбөйүп жатканына карабастан, расмий Москва жаңы кырдаалда карантиндик чектөөлөргө барган жок.


Ал эми Австралиянын Виктория штатында чектөө киргизилген 2-августтан бери кыйла жылыштар болду. Бул штатта акыркы 28 күндөн бери бир дагы коронавируска кабылуу учуру жана анын айынан өлүм катталган жок. Эми 28-октябрдан бери бул аймакта чектөөлөрдүн бир тобу алынып салынды. (TT)