"Бункердаги бобо": Кремль Байденни қария, Путинни эса кучли раҳбар сифатида кўрсатишга уринмоқда
Кейинги ойларда Путин асосий вақтини меҳмонлар учун махсус дезинфекция хонаси билан жиҳозланган қароргоҳида хавфсизлик хизматлари қуршовида ўтказмоқда. Washington Post мақоласига кўра, Навальний Путинни такрор ва такрор «бункеридаги бобо» деб атагани президентнинг имижига салбий таъсир кўрсатган: айрим россияликлар уни рус айиғи эмас, балки қўрқоқ қария ўлароқ кўра бошлаган.
Натижада Кремль 68 ёшли Путинни ҳали келажаги олдида бўлган куч- ғайратга тўла раҳбар, 78 ёшли Байденни эса қария ўлароқ кўрсатишга қаратилган давлат пропагандасини бошлади.
Ғарбга қарши чиқишлари билан танилган телешарҳловчи Дмитрий Киселёв Байденни «америкалик бемор» деб атади. Киселёв «Шамол олиб кетганлар» (бу фильм ўзбекчага «Шамолларда қолган ҳисларим» деб таржима қилинган -таҳр) ёзуви билан Байден Air Force One учоғи зинапоясида қоқилиб кетаётгани акс этган лавҳани ўзида йўқ мамнунлик билан намойиш этди.
Байден 16 март куни ABC News телеканалига берган интервьюсида россиялик ҳамкасби Путинни руҳсиз «қотил» деб ҳисоблашини айтиб, Россия расмийларининг ғазабини қўзғатган эди. Аммо айрим россиялик таҳлилчиларга кўра, Байден кузга белгиланган сайловлар арафасида рейтинги тушиб бораётган ҳукмрон «Единая Россия» партияси ҳамда Путин учун жуда қўл келадиган гапни айтди.
Байден Путинни ўзини пандемиядан ҳимоя қилиш учун уйига беркиниб олган қўрқоқ эмас, балки ташқи душманга қарши курашаётган қудратли етакчи ўлароқ кўришларига ҳисса қўшди.
Москва Карнеги маркази сиёсий таҳлилчи Константин Гаазе «ички сиёсат нуқтаи назаридан [Байденнинг шарҳи] Путинга ёрдам берди, чунки унда гапиришга мавзу деярли қолмаган эди», - деди.
«Коммерсантъ» газетасида эълон қилинган мақолада «Байден туфайли» Путиннинг «Единая Россия» партияси парламентнинг қуйи палатасидаги барча ўринни эгаллаши мумкинлиги тахмин қилинди.
Ҳаётида бирон марта ички сиёсий рақиби билан дебат ўтказмаган Путин 18 март куни Байденни жонли дебатга чорлади. Washington Post мақоласида айтиб ўтилганидек, икки мустақил давлат етакчиси дебат ўтказганини кўз кўриб, қулоқ эшитмаган. Бу чақириқ ортидан Путин Сибирь тайгасига йўл олди.
Кремль Путиннинг имижига жуда катта эътибор қаратади. Россиянинг суриштирувлар ўтказувчи «Проект» нашри декабрь ойида учоқ парвозларига таянган ҳолда президент Сочида яшаётгани, буни яшириш учун Москвадаги офиси репликасини қурдирганини хабар қилди. Кремль эса буни зўр бериб рад этди.
Январь ойида эса Навальний Геленжик яқинидаги 1,36 миллиард доллар деб баҳоланган «Путин саройи» ҳақидаги суриштирув видеосини эълон қилди. Ўшанда бери бу суриштирув YouТube платформасида 115 миллион мартадан кўп кўрилди.
Бу орада Россия ҳукумати Навальнийни аввалига заҳарлаб, ўлмай қолганидан кейин қамагани учун АҚШ ва Европа Иттифоқи Россияга қарши янги санкциялари жорий қилди ва яна қўшимча санкция қўллаши мумкин.
Январь ойида Россияга қайтиб келган Навальнийнинг қамоққа олиниши ва Россия ҳукумати намойишларни бостириш учун қабул қилган кескин қонунлар туфайли Россиянинг 100 дан ортиқ шаҳрида норозилик намойишлари бўлиб ўтди. Россиялик ёшларнинг кўчилиги учун Путин совуқ, репрессив ва ҳурматга сазовор бўлмаган етакчидир
Аммо Путин яқинда яна эътибор марказига қайтди. Хусусан, президент Россия 2014 йилда Қримни Украинадан аннексия қилиб олганини нишонлаш учун Москванинг «Лужники» стадионида тўпланган оломон олдида нутқ сўзлади.
Бунинг ортидан Путин Кремль журналистлари қуршовида Сибирдаги Тувага борди. У ерда президент йўлтанламасда қорли ўрмонда йўл юриб, табиат қўйнидаги столда чой ичди. Ушбу тадбир Байденнинг «қотил» шарҳидан анча олдин режалаштирилган эди, аммо у Путинга ўзини табиатни севувчи «мужик» ўлароқ кўрсатиши учун қўл келди, дея хулоса қилади Washington Post мухбири Диксон.