Новости за 08.05.2024

Бүген Сабаның Яңа Мичән авылында Бөек Ватан сугышында һәлак булган авылдашлар истәлегенә обелиск ачылды. Бу хакта https://saba-rt.ru/ хәбәр итә.

Димитровградта Татар мәдәнияте үзәгендә «Сембер карлыгачлары» татар җыры өлкә фестивале булды. Чарада Ульяновск һәм өлкә җырчылары һәм ансамбльләре катнашты. Конкурс «Татар халык җыры» Һәм «Хәзерге композиторларның татар җыры» вокал коллективлары һәм ялгыз башкаручылар арасында узды. Бу хакта Бөтендөнья татар конгрессы матбугат хезмәте хәбәр итә.

11-12 майда Казанда һәм Татарстанда «Зур гаиләнең ял көннәре» узачак. Бөтенроссия проекты Гаилә елына багышлана. Бу турыда республика Хезмәт, халыкны эш белән тәэмин итү һәм социаль яклау министрлыгы хәбәр итә.

Бүген Казанда Җиңү паркында «Алга» батальоны хәрбиләренә багышланган митинг узды, алар засадага эләгә һәм 2023 елның 6 февралендә һәлак була. Митингны оештыручы булып һәлак булган хәрбиләрнең берсенең әтисе чыгыш ясады.

Җиңү көне алдыннан Мәскәүдә шагыйрь Муса Җәлил һәйкәленә чәчәкләр салу тантанасы булды. Советлар Союзы Героен искә алырга Татарстанның Россиядәге Тулы вәкаләтле вәкиле Равил Әхмәтшин, һәйкәл урнашкан Зябликово районы җитәкчелеге һәм халкы килде. Бу турыда Тулы Вәкаләтле вәкиллекнең телеграм-каналында хәбәр ителә.

Иртәгә, 9 майда, 9.00 сәгатьтә Казанның Үзәк стадионы янында Меңьеллык мәйданында контракт буенча хәрби хезмәткә сайлап алу мобиль пунктының палаткасы җәелдереләчәк. Бу хакта «Татарстанда мобилизация» телеграм-каналы хәбәр итә.

Габдулла Тукай туган көнендә Казан Кирмәненең гавәми урыннарында Татарстан Рәисе Рөстәм Миңнеханов татар җәмәгатьчелеге белән очрашты. Очрашуда катнашкан «Идел» татар һәм рус журналларының баш мөхәррире Рәмзия Галимова журналларны югары һәм махсус урта уку йортларында сату мөмкинлекләрен булдыруда ярдәм сорады.

Татарстан Диния нәзарәтенең Аксакаллар шурасы рәисе Айрат хәзрәт Әюпов фикеренчә, Бөек Ватан сугышы вакытында татар халкы үз динен гореф-гадәтләр ярдәме белән саклап кала алган. Бу хакта ул Татарстан Диния нәзарәтендә «Бөек Ватан сугышында катнашкан татарлар һәм ветераннар, ислам яңарышы (XX гасырның икенче яртысы)» Россиякүләм конференциясенең пленар утырышында әйтте.

Теләче районы Олы Саурыш авылында Бөек Ватан сугышында катнашкан авылдашлар хөрмәтенә һәйкәл обелиск ачылган.

Татарстан башкаласында Җиңү көнендә уртача тәүлеклек һава температурасы климат нормасыннан шактый түбән булачак. Бу көнне көчле җил көтелә. Бу хакта «Татар-информ»га КФУның Экология һәм табигатьтән файдалану институты метеорология, климатология һәм экология кафедрасы доценты Тимур Әүхәдиев хәбәр итте.

Контракт буенча хәрби хезмәткә алынган һәм «Алга», «Тимер» һәм «Батыр» батальоннарына җибәрелгән гражданнар 360 мең сум күләмендә бер тапкыр бирелә торган акчалата түләү алачак. Әлеге карарны Татарстан Рәисе Рөстәм Миңнеханов имзалады.

Татарстан Диния нәзарәтенең Аксакаллар шурасы рәисе Айрат хәзрәт Әюпов республикага Бөек Ватан сугышы вакытында күп авырлыклар килгәне турында сөйләде. Бу хакта ул Татарстан Диния нәзарәтендә «Бөек Ватан сугышында катнашкан татарлар һәм ветераннар, ислам яңарышы (XX гасырның икенче яртысы)» Россиякүләм конференциясенең пленар утырышында әйтте.

Россиядә туучылар санын һәм өченче һәм аннан соңгы балаларның туу күрсәткечен арттырырга. Россия хакимияте алдына шундый бурычны ил Президенты Владимир Путин куйды. Аның йөкләмәсе «2030 елга кадәр һәм 2036 елга кадәрге чорга Россия Федерациясе үсешенең илкүләм максатлары турында»гы карарында язылган.

Ижевскида 11 нче тапкыр «Татар Кызы» бәйгесе узды. Тамашачыны Дәүләт филармониясенең зур залында Удмуртия мәдәният министры Владимир Соловьев сәламләде. Бу хакта Бөтендөнья татар конгрессы сайтында хәбәр ителә.

Татарстанда партнерлык (ислам) финанславы буенча тәҗрибә кысаларында ташламалы продукт эшли башлады. Ташламалы продукт Татарстан Диния нәзарәте Голәмәләр шурасы тарафыннан хупланды һәм 7 майдан эшләтеп җибәрелде. Бу хакта Татарстан Икътисад министрлыгы матбугат хезмәте хәбәр итә.

Татарстан Рәисе Рөстәм Миңнеханов Казан дәүләт казна дары заводында булды. Ул предприятие ветераннары белән очрашты һәм Бөек Ватан сугышында катнашкан хезмәткәрләрне искә алу мемориалына чәчәкләр салды. Бу хакта Татарстан җитәкчесе матбугат хезмәте хәбәр итә.

Җиңү көне - Россиянең һәр төбәге өчен бөек бәйрәмнәрнең берсе, изге көн. Бу хакта журналистларга Татарстан Дәүләт Советы Рәисе, «Бердәм Россия» төбәк бүлеге секретаре Фәрит Мөхәммәтшин Бөек Ватан сугышында катнашучылар белән онлайн-очрашудан соң белдерде.

«Моң» театраль мәйданында бию импровизациясе киче булачак. Ул «Җыен 2.0» дип атала. Проект мәдәни инициативалар Президент фонды ярдәмендә гамәлгә куела.

Бүген Пискарев мемориаль зиратында Бөек Ватан сугышында Җиңүнең 79 еллыгына багышланган веноклар һәм чәчәкләр кую тантанасы узды. Бу хакта Татарстанның Санкт-Петербургтагы һәм Ленинград өлкәсендәге Даими вәкиллек матбугат хезмәте хәбәр итә.

Татарстан Республикасы Хөкүмәтендә Җиңүнең 79 еллыгын бәйрәм итүгә әзерлек һәм үткәрү буенча оештыру комитеты утырышында Чаллы мэры Наил Мәһдиев хәзерге буынның Бөек Ватан сугышы ветераннарын күреп калган соңгы буын булуын искәртеп узды.

Бүген кич һәм иртәгә Татарстанда һава шартларының начараюы көтелә. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Бөтендөнья татар конгрессы Башкарма комитеты җитәкчесе Данис Шакиров фикеренчә, мәдрәсә-мәхәлләләрдә татар теле предмет буларак кына түгел, ә уку-укыту эшчәнлегендә дә кулланылырга тиеш. Бу фикерен ул Татарстан Диния нәзарәтендә «Бөек Ватан сугышында катнашкан татарлар һәм ветераннар, ислам яңарышы (XX гасырның икенче яртысы)» дип исемләнгән Россиякүләм конференциясенең пленар утырышта әйтте.

БРИКС Уеннарында катнашу өчен 100дән артык илдән 5 меңгә якын спортчы гариза биргән. Бу хакта РИА Новости «Спорт һәм социаль проектлар дирекциясе» генераль директоры Максим Денисовка сылтама белән хәбәр итә.

16 майда 14.00 сәгатьтә КФУның Филология һәм мәдәниятара багланышлар институтының актлар залында филология фәннәре докторы, Казан университетының атказанган профессоры, Россиянең һәм Татарстанның атказанган фән эшлеклесе, КФУның татар әдәбияты кафедрасы галиме Хатыйп Миңнегуловның 85 яшьлек юбилей кичәсе була.

2025 елда Татарстанда Бөек Ватан сугышы елларында эшләгән барлык учерждение, предприятләрнең архив материаллары күргәзмәсен булдырырга телиләр. Бу тәкъдимне ТР Премьер-министр урынбасары Ләйлә Фазлыева ТР Министрлар Кабинетында 1941-1945 еллардагы Бөек Ватан сугышында Җиңүнең 79 еллыгын бәйрәм итүгә әзерлек һәм үткәрү буенча оештыру комитеты утырышында әйтте.