Бишкекте мүлк боюнча чечим чыгарган мурдагы сотко кылмыш иши ачылды

Бишкек шаарынын райондор аралык сотунун мурдагы судьясынын (Н.Ж.) иштеп турган мезгилдеги чечими боюнча кылмыш иши ачылып, сотко чейин өндүрүшкө алынды. Бул тууралуу Экономикалык кылмыштарга каршы күрөш боюнча мамлекеттик кызмат (Финансы полициясы) билдирди.

Тергөөдө аныкталгандай, мурдараак «Г.Э.»  жана «ЭДС» жоопкерчилиги чектелген коомдорунун ортосунда мүлк сатуу боюнча алды-сатты келишими түзүлгөн. Ага ылайык Бишкектин Скрябин көчөсүндөгү 45-45 дарегиндеги жер тилкеси «ЭДС» фирмасына өткөрүлгөн. Кийин бул кыймылсыз мүлк кылмыш ишинин алкагында камакка алынып, мамлекетке конфискация жасалышы керектиги ачыкка чыккан.

Ага карабай аталган судья (Н.Ж.) кызмат абалынан кыянаттык менен пайдалануу аркылуу өзү билип турган жагдайда, кеп болуп жаткан келишимди жокко чыгарып, мүлктү кайра каттоого уруксат берген. Ал мүлккө коюлган камакты алып салганына байланыштуу мамлекетке өтчү тилке үчүнчү тарапка сатылып кеткен.

Кеп болгон факт боюнча мурдагы судьяны кылмыш жоопкерчилигине тартууга Соттор кеңешинин Дисциплинардык комиссиясы макулдук берди. Учурда тергөө иштери уланып жатат.

“24.kg” сайты өз булактарына таянуу менен иш ачылган экс-судья Жыргалбек Нурунбетов экенин жана келишим түзгөн фирмалар «Global Advertising», «ЭлитДомСтрой» деп аталарын жазды. (ErN)