Спасовски со осуда за отворањето на бугарскиот клуб „Цар Борис Трети“

Министерот за внатрешни работи, Оливер Спасовски изјави дека денешните протести во врска со отворањето на бугарскиот клуб „Цар Борис Трети“ во Охрид завршиле без посебни нарушувања на јавниот ред и мир. Според него, немало никакви обиди за судир со полицијата.

„Јас го разбирам протестот кој го изразуваат граѓаните како најсилно право да го искажат тоа што го размислуваат. Лично јас, осудувам отворање на таков клуб во Република Северна Македонија, посебно во Охрид. Зошто, заради тоа што ние сме држава која е родена на придобивките на НОБ. Тие придобивки ги чуваме ги негуваме заради тоа што на тој начин ја чуваме државата. Во идеолошка смисла јас сум следбеник на тие политики и мислам дека е апсолутно неприфатливо да биде промовиран начинот на однесување преку ликови кои биле дел од фашизмот“, порача Спасовски во интервју за Макфакс.

Прекршочна пријава за едно лице по протестите во Охрид

Спасовски смета и дека е многу е нелогично што од една страна барањата на Бугарија се дека не треба да се нарекуваат фашисти, наспроти историските факти, што од друга страна, воопшто не кореспондира со настаните кои сакаат да ги промовираат во Северна Македонија.

Од СВР Охрид денеска информираа дека полициските службеници евидентирале едно лице кое на јавно место фрлило предмет кон група граѓани на протестите, против кое ќе биде поднесена прекршочна пријава по член 5 од Законот за прекршоци против јавниот ред и мир.

Додека траеше церемонијата на отворањето на бугарскиот клуб „Цар Борис Трети“ во Охрид, стотини граѓани протестираа. Спорно им е името на клубот и здружението на граѓани кое стои зад него.