Европска Комисија чека решение од Белград и Приштина за регистарските таблички

Европската Комисија( ЕК) се надева дека Белград и Приштина преку преговори ќе изнајдат „соодветно решение“ за спорот околу пререгистрацијата на возилата во Косово пред истекот на крајниот рок в понеделник.

„Белград и Приштина треба да најдат соодветно решение со посредство на пратеникот на ЕУ, Мирослав Лајчак“, рече портпаролот на Европската Комисија, Ерик Мамер.

Тој потсети дека претседателката на ЕК, Урсула фон дер Лајен, вчера од Приштина упати повик двете страни да продолжат со преговорите во рамките на тековниот дијалог.

Рокот на Приштина за пререгистрација на возила истекува на 31 октомври. Косовските власти веќе еднаш го одложија стартот на пререгистрацијата.

Инциденти на северот на Косово во пресрет на крајниот рок за пререгистрација на возилата

На 31 јули, откако Србите подигнаа барикади на северот, косовските власти го одложија процесот на пререгистрација за еден месец, односно наместо на 1 август, процесот започна на 1 септември.

Белград бара договор за ова прашање, односно враќање на статусно неутралните таблички КС, што Приштина засега го одбива.