Мунтахаби футзали Ҷопон бори чаҳорум қаҳрамони Осиё шуд
Дастаи мунтахаби футзали Ҷопон, ки дар бозии ниҳоии Ҷоми Осиё-2022 тими миллии Эронро бо ҳисоби 3:2 мағлуб кард, ба унвони қаҳрамонӣ даст ёфт. Бозии ниҳоӣ рӯзи шанбе, 8-уми октябр, дар Кувайт баргузор шуд.
Ба ин тартиб, мунтахаби Ҷопон бори чаҳорум ба унвони қаҳрамони Осиё мушарраф гардид ва барои бохт дар финали мусобиқоти гузашта аз Эрон қасос гирифт. Зимнан, тими миллии Эрон дувоздаҳ бор барандаи Ҷоми Осиё гардидааст.
Пеш аз финал рӯзи шанбеи гузашта дар маҷмааи варзишии «Саъд Ал-Абдуллоҳ»-и Ал-Кувайт дастаҳои мунтахаби миллии Узбекистон ва Тайланд барои ҷойи севум талош карданд. Ин бозӣ бо пирӯзии футзалбозони узбек бо ҳисоби бузурги 8:2 хотима ёфт ва онҳо бори дувум пайиҳаи бо медалҳои биринҷии мусобиқот сарфароз шуданд.
Барои унвони зӯртарин дастаи қора 16 тими миллӣ мубориза бурданд. Дар бозиҳои даври ниманиҳоии Ҷоми Осиё-2022, ки 6-уми октябр дар Кувайт баргузор шуд, мунтахаби Ҷопон дастаи Узбекистонро бо ҳисоби 2:1 ва мунтахаби Эрон тими Тайландро бо ҳисоби 5:0 шикаст доданд.
Дастаи мунтахаби футзали Тоҷикистон, ки дар даври чорякниҳоии Ҷоми Осиё-2022 аз тими миллии Тайланд бо ҳисоби 2:3 шикаст хӯрд, аз ҳаққи ширкат дар нимфинали мусобиқот маҳрум гардид.
Мунтахаби Тоҷикистон, ки бори дувум дар таърихи худ ба чорякфинали қаҳрамонии Осиё роҳ ёфт, ба мисли соли 2007 дар Ҷопон дар даври чорякниҳоӣ ноком шуд.
Дастаи мунтахаби футзали Тоҷикистон бо роҳбарии сармураббӣ Пайрав Воҳидов дар байни ҳашт дастаи зӯртарини Осиё қарор гирифт.
Ҷоми Осиё-2022 оид ба футзал
Чорякфинал
Тайланд – Тоҷикистон – 3:2
Голҳо: Панут Киттипанувонг, 2 (1:0). Иқбол Воситзода, 28 (1:1). Идрис Ёров, 34 (1:2). Ҷетсада Чудеч, 35 (2:2). Ворасак Срирангпирот, 40 (3:2).
4 октябр. Ал-Кувайт. Маҷмааи варзишии «Саъд Ал-Абдуллоҳ». 236 тамошобин.
Ҷопон – Индонезия – 3:2
Эрон – Ветнам – 8:1
Узбекистон – Кувайт – 3:0
Нимфинал
Узбекистон – Ҷопон – 1:2
6 октябр. Ал-Кувайт. Маҷмааи варзишии «Саъд Ал-Абдуллоҳ».
Тайланд – Эрон – 0:5
6 октябр. Ал-Кувайт. Маҷмааи варзишии «Саъд Ал-Абдуллоҳ».
Бозӣ барои ҷойи сеюм
Узбекистон – Тайланд – 8:2
8 октябр. Ал-Кувайт. Маҷмааи варзишии «Саъд Ал-Абдуллоҳ».
ФИНАЛ
Ҷопон – Эрон – 3:2
8 октябр. Ал-Кувайт. Маҷмааи варзишии «Саъд Ал-Абдуллоҳ»