Aşgabat 'Wozroždeniýe' rus kompaniýasy bilen muzdsuz şertnama baglaşar

Aşgabat şäheriniň häkimligine “Wozroždeniýe” önümçilik birleşigi paýdarlar jemgyýeti bilen şertnama baglaşmaga ygtyýar berildi diýip, Türkmen döwlet habarlar (TDH) gullugy ýazdy.

Resmi maglumata görä, paýtagtda Magtymguly Pyragynyň täze ýadygärliginiň durkuny täzelemek we ýanaşyk ýerlerini abadanlaşdyrmak göz öňünde tutulýar. Gurluşyk işlerine 2022-nji ýylyň sentýabr aýynda başlamagyň we ony 2024-nji ýylyň maý aýynda doly tamamlamagyň göz öňünde tutulýandygy habar berilýär.

TDH-nyň habarynda prezidentiň gol çeken kararynyň maksady "Berkarar döwletiň täze eýýamynyň Galkynyşy döwründe paýtagtymyzyň ýaşaýjylarynyň we myhmanlarynyň medeniýetli dynç almagy üçin has amatly şertleri döretmek, şeýle hem Aşgabat şäheriniň binagärlik-şäher gurluşyk keşbini has-da gözelleşdirmek" diýlip häsiýetlendirilýär.

Resminama laýyklykda, Aşgabat şäheriniň häkimligine Russiýa Federasiýasynyň “Wozroždeniýe” kompaniýasy bilen ylalaşygy muzdsuz esasda baglaşmaga ygtyýar berildi. Muzdsuz diýlip, nämäniň göz öňünde tutulýandygy aýdyňlaşdyrylmaýar.

Rus kompaniýasynyň websaýtyndaky maglumata görä, onuň işleýän ýerleriniň sanawynda Orsýetiň birnäçe regiony bar, daşary ýurtlardan diňe Türkmenistan, has anygy Aşgabat we Türkmenbaşy şäherleri görkezilýär.