Тәтешнең арт-терапия аша өлкән кешеләрне тернәкләндерү проекты грант откан

(Казан, 6 декабрь, «Татар-информ»). «Тәтеш балкышы» социаль хезмәт күрсәтү үзәге социаль проектлар XI конкурсында диплом алды. Бу хакта «Авангард» газетасы яза. Проектның авторы — социаль эш буенча белгеч Наталья Мурзаева. «Проект өлкән кешеләрне һәм сәламәтлек буенча мөмкинлекләре чикле кешеләрне арт-терапия аша тернәкләндерүгә юнәлтелгән», — диде проект авторы. Арт-терапия — сәнгать һәм иҗат кулланып психотерапиягә һәм психологик коррекциягә юллама. Проектны киләсе елның 30 июненә кадәр гамәлгә ашыру планлаштырыла. 2020 елда конкурс комиссиясенә 872 проект тапшырылган. Аларның 155е җиңү булып танылган. Җиңүчеләр 2020 елның ахырына кадәр үз инициативаларын чынга ашыруга акча алачак. Конкурсның грант фонды 25 миллион сум тәшкил иткән.