Чирмешән районының Ивашкино авыл җирлеге Советы яңа биналы булды

(Чирмешән, 24 декабрь, «Татар-информ», «Безнең Чирмешән» , Кадрия Гамирова). Чирмешән районының Ивашкино авылында авыл җирлеге Советының яңа бинасы ачылды. Җыйнак һәм шул ук вакытта барлык уңайлыклары да булган бинаны ачуда Татарстан Муниципаль берәмлекләр ассоциациясе Советы рәисе Әгъзам Гобәйдуллин да катнашты. Бу турыда район басмасы хәбәр итә. «Хәзер авыл җирлекләре башлыкларының роле зур, халык барлык сораулар буенча аларга мөрәҗәгать итә, — диде Шуның өчен бу бина матур һәм уңайлы булырга тиеш», — диде ул. 100 квадрат метр тирәсе мәйданлы бинаны төзү өчен республика программасы буенча 6 миллион сумга якын акча бирелгән. Ә җиһазлар өчен акча район бюджетыннан бүленгән. Биредә, проект буенча, өч эш кабинеты, архив бүлмәсе эшләнгән, санузел да бар. Бинада якты, җылы, барлык уңайлыклар да тудырылган, краннардан җылы һәм салкын су ага, идәннәргә паласлар җәелгән. «Төзүчеләргә рәхмәт, эшне тиз тоттылыр. Яз көне башлаган эшне Яңа ел алдыннан төгәлләп тә куйдылар. Ивашкино авыл җирлеге Советының элеккеге рәисе Никонор Ефимов тырышлыгы белән башланган төзелеш бу. Мондый биналы булуыбызда аның өлеше дә зур», — ди авыл җирлеге Советы башлыгы Николай Емельянов бинаның символик ачкычын кулына алгач. Ивашкино авыл җирлеге хезмәткәрләре күп еллар элеккеге колхоз идарәсе бинасында сыенганнар, соңгы елларда авыл балалар бакчасы бинасыннан бер бүлмә биргән булганнар. Менә инде аларның үз йортлары булды. Бүген авыл җирлегенә керүче Әккәрәй һәм Ивашкино авылларында 362 йортта 1253 кеше яши. Кызганыч, сиксәннән артыграк йорт буш. Быел авыл җирлегендә яңа туган 8 сабый теркәлгән, тик аларның дүртесе генә авылда яши. Җиде йортта туй булган, тик авылда төпләнүчеләре генә юк. Ивашкино авыл җирлеге Советы 1976 елда оешкан, моңа кадәр ул башка җирлекләргә кушылган булган.