Лениногорск халык театры премьера тәкъдим итәргә җыена

(Лениногорск, 9 февраль, «Татар-информ», « Заман сулышы »). Лениногорскиның Рәшит Шиһап исемендәге халык театры артистлары яңа спектакль алып, шуны өйрәнә башлаган. Театр артистлары Нәбирә Гыйматдинованың «Чынга ашкан хыял» әсәре буенча «Бәхет шәле» дип исемләнгән спектакльне куярга әзерләнә. Әлеге спектакльдә театр осталары Мәдинә Сафиуллина, Флера Тахавова, Рәфис Сөләйманов уйнаячак. Төп рольләрнең берсен шагыйрә Гүзәл Талипова башкарачак. Яңа артистлар — яшь егет Ринат Шәрипов, икенчесе — 11нче гимназиянең 7 нче сыйныф укучысы Рияз.Тамаша халык күңеленә тагы да ныграк үтеп керсен өчен музыкаль тәэмин ителеш юнәлешендә Гүзәл Вәлиуллова эшләгән. Бу турыда район басмасы хәбәр итә. Спектакльга сценарийны Гүзәл Талипова язган. Сәхнәгә алар аны Флера Тахавова белән бергә куялар. «Әлеге халык театрында мин икенче ел уйныйм. Зөмәрә Шәрәпованың яшьләр театрында да катнашам. Мәктәптә укыган елларда ук кечкенә генә сценарийлар яза идем. Ә инде менә шушындый җитди, зур сценарийга беренче тапкыр алындым. Спектакльдә барган төп вакыйга — чынбарлык тормышта булган хәл. Тамашачыга охшар дип өметләнәбез», — ди Гүзәл Талипова. Мәдинә апа Сафиуллина театр өчен әле дә җан атып яши, һәрбер рольне үз күңеле аша кичерә. Артистларга үз киңәшләрен кызганмый. Тамашачыга үтемлерәк булсын, дип тырыша. Әлеге спектакль Лениногорск халык театрының беренче җитәкчесе, режиссеры Рәшит Шиһап һәм театрның йөзек кашы булган Энҗе Мусинаны искә алу уңаеннан куела. Спектакль премьерасы 19 мартка билгеләнгән.