Фальков Казан федераль университетының Россия югары белем бирү системасындагы ролен әйтте

Казан федераль университеты, Татарстанда флагман һәм лидер буларак, Россия югары белем бирү системасы өчен зур әһәмияткә ия, дип белдерде Россия Федерациясе Фән һәм югары белем министры Валерий Фальков.

«КФУ Татарстанда лидер һәм илнең әйдәп баручы югары уку йортларының берсе, шуңа күрә теләсә кайсы университет өчен традицион бурычлар белән беррәттән, аның шулай ук интеграцияләү функциясе дә бар: башка югары уку йортларына да динамиканы югалтмаска һәм республика мәнфәгатьләрендә үсеш алырга ярдәм итү», –  дип сөйләде министр журналистларның сорауларына җавап биреп.

Ул билгеләп үткәнчә, Татарстанның башка югары уку йортлары да бүгенге көндә актив үсештә. Мисал итеп, Фальков Әлмәт нефть институтын китерде, ул үз үсешенең динамикасы белән илнең күп кенә төбәк югары уку йортлары өчен яхшы үрнәк булып хезмәт итә ала.

«Бүген монда – Татарстан башкаласында тагын ике университетта булдым: Авиация (КАИ) һәм Архитектура-төзелеш (КГАСУ). Алар тармак югары уку йортлары, һәм икесе дә үзенчә уникаль. Миндә бик яхшы тәэсирләр калды. Ике югары уку йорты да үз бурычларын яхшы үти, аларның амбициоз планнары бар, шуңа күрә без аларга һичшиксез ярдәм итәчәкбез», – дип белдерде Фальков.