Түбән Камада вакансияләр ярминкәсе уза
Түбән Камада «Работа России. Время Возможностей» Бөтенроссия ярминкәсе уза. Бу хакта Түбән Кама муниципаль районы рәсми сайтында хәбәр ителә.
Ачылу тантанасында түбәнкамалыларга сәламләү сүзе белән Түбән Кама мэры урынбасары Марина Камелина һәм Түбән Кама муниципаль районы Башкарма комитеты җитәкчесенең социаль мәсьәләләр буенча урынбасары Айзат Мәхмүтов мөрәҗәгать итте. Чара «Демография» илкүләм проекты кысаларында уза.
«Түбән Каманың бу көннәрдә масштаблы бөтенроссия акциясенә кушылуы бик шәп. Без Түбән Каманы мөмкинлекләр территориясе итеп күрсәтәбез. Бу проект безнең шәһәрнең нинди мөмкинлекләре һәм перспективалары барлыгын бик яхшы ассызыклый. Барлык оешмаларга, бигрәк тә социаль блокка зур рәхмәт», – диде Марина Камелина.
Ярминкәдә шәһәрнең эш бирүчеләренең вакансияләре һәм эшкә урнашу вариантлары тәкъдим ителде.«Бездә күпме эш һәм мөмкинлекләр барлыгын карагыз. Алга таба да сезнең белән бергә Түбән Каманы үстерәчәкбез», – диде шәһәр мэры урынбасары.
Ике көн дәвамында Халык иҗаты йортында түбәнкамалылар эш таба, резюме төзергә өйрәнә, әңгәмәне ничек уңышлы узарга, тренингларда һәм карьера остаханәләрендә катнашырга, экспертлар консультациясен алырга, шулай ук баласына һөнәр сайларга ярдәм итә ала. Шәһәр халкы шулай ук үз эшен ничек ачарга, мәшгульлек мәсьәләләре буенча киңәшләшергә, шулай ук интеллектуаль уенда катнашырга өйрәнә ала.
«Кадрлар барысын да хәл итә. Чыннан да, бу шулай. Биредә кандидатларның карьера үсеше өчен вариантлар күп. Мин бу ике көннең уңышлы узуын теләр идем», - диде Айзат Мәхмүтов.
Искәртик, ярминкәгә 15 апрельдә дә килергә мөмкин. Чара Лемаев скверы, 14 адресы буенча 10:00 сәгатьтән 16:00 сәгатькә кадәр уза.