Транспорт министрлыгы авиабилетларның 15-30 процентка кыйммәтләнәчәге турында кисәтә

РФ Транспорт министрлыгы фаразлары буенча, җәйге сезонда авиабилетлар бәясе 15-30 процентка артырга мөмкин. Бу хакимиятнең пассажирлар ташуны субсидияләү турында карар кабул итмәве белән аңлатыла, дип хәбәр итте министрлык башлыгы урынбасары Игорь Чалик туристлык сезонына әзерлек буенча киңәшмәдә.

Ул быел хакимиятнең 2022 елга охшаш субсидияләрне бүлеп бирүне хупламаганын аңлата, узган ел бу вакытта әлеге максатларга 100 млрд сум бүлеп бирелгән булган.

«Шуңа бәйле рәвештә, без транспорт бәясе якынча 15-30 процентка артачак дип көтәбез. Шуңа күрә, мөгаен, рейслар саны да кимер», дип китерә Чалик сүзләрен «Интерфакс».

Авиакомпанияләр өчен дәүләт субсидияләре күләменең кимүе инде рейслар санының кимүенә китергәнлеген Росавиация башлыгы урынбасары Владимир Потешкин хәбәр итте. Ул субсидияләнгән өч очыш программасы эшләвен дәвам итүен искәртте.

«Шулай да, хәзерге вакытта үткәрелә торган бюджет акчаларының кимүе 10612 рейс кыскаруына китергәнен билгеләп үтәсем килә, шуларның 4947се барып җитү авыр булган төбәкләргә туры килә», – диде Потешкин.

Авиациядә җәйге сезон март ахырыннан алып октябрь ахырына кадәрге чор. Узган ел бу вакытка санкцияләр фонында авиакомпанияләр эчке ташуларны башкарганда чыгымнарны каплау өчен 100 млрд сум акча алдылар. Кышкы сезонда бу максатларга 25,3 млрд сум юнәлтелгән.