Gazagystan Hindistanyň, Eýranyň we Hytaýyň raýatlary üçin wizasyz gatnaw açýar
Hindistanyň, Eýranyň we Hytaýyň raýatlary 8-nji iýuldan başlap, işewürlik, hususy, syýahatçylyk maksatly syýahatlara rugsat berilmegi esasynda, serhetden geçen gününden soň , Gazagystanda 14 güne çenli wizasyz galyp bilerler.
Şeýlelikde, Hindistan we Hytaý üçin ozalky 72 sagatlyk wizasyz, üstaşyr geçmek düzgüni güýjüni ýitirýär.
Medeniýet we sport ministriniň orunbasary Ýeržan Erkinbaýew iýun aýynda Gazagystanyň wizasyz gatnaşyk edilýän ýurtlaryň sanawyny 100-e ýetirjekdigini habar berdi.
“Bu ýyl 500 müňden 1 milliona çenli daşary ýurtly syýahatçynyň kabul edilmegine garaşýarys. Pandemiýa sebäpli serhetler ýapyldy we çäklendirmeler girizildi. Bu günki günde ähli çäklendirme ýatyryldy. 74 ýurt üçin wizasyz gelmek mümkinçiligi dikeldildi. Bu sanawy 100-e ýetirmegi meýilleşdirýäris. Düýnki günden başlap, elektron wiza bermäge başladyk” diýip, Erkinbaýew aýtdy.