13 ýaşly gyzy zorlamakda güman edilýänler günäni inkär edýärler
12-nji iýulda Bişkek şäheriniň Swerdlow etrap kazyýeti 13 ýaşly bir gyzy zorlamak meselesi boýunça diňlenişik geçirdi. Bu işde güman edilýänleriň arasynda iki milisiýa işgäri we geçmişde iş kesilen raýatlar bar.
Jepa çeken tarapyň aklawçysy Timur Soltanowyň mälim etmegine görä, kazyýet diňlenişiginde, üç şaýatdan sorag edilipdir, beýleki biri diňlenişige gelmändir. Diňlenişik ýene dowam etdiriler.
“12-nji iýulda geçen diňlenişikde, günäkärlenýänler özlerini günäkär hasaplamadylar, ýagny günälerini boýun almadylar. Geljekki kazyýet diňlenişiginde, biz olaryň pozisiýasyny ýene diňläp bileris" diýip, aklawçy aýdýar.
Günäkärlenýänleriň biriniň aklawçysy öz müşderisiniň suratyny sosial ulgamlarda ýaýradandygy üçin, kazyýet mejlisinde ony jogapkärçilige çekmegi haýyş edendigini jebir çekeniň aklawçysy aýdýar.
Ombudsmen institutynyň hem-de Ombudsmeniň çagalaryň hukuklary meselesini alyp baryjy wekiliniň kazyýet mejlisine gatnaşmagyna rugsat berilmändigi öň habar berildi. Kazyýet ýapyk gapylaryň aňyrsynda geçirilýär. 8-nji iýulda geçirilen diňlenişikde, hakykatçynyň wekiline-de ol ýere girmäge rugsat berilmändi. Şonda kazy Aziz Eşaliýew aýyplanýan tarapyň olaryň gatnaşmagyna garşydygyny aýtdy.
Azatlyk Radiosynyň Gyrgyz gullugy mundan ozal 13 ýaşly gyzjagazyň zorlanandygyny habar beripdi. Bu işde dört adama şübhe bildirilýär, olaryň ikisi milisiýa işgäri. Bu waka köpçüligiň arasynda giň nägilelik döretdi. Aktiwistler Içeri işler ministriniň wezipesinden çekilmegini talap edip ýöriş geçirdiler. Krizis merkezleri bolsa prezidente ýüz tutup, bu işe çäre görmäge we aýal-gyzlara hem-de çagalara garşy edilýän zorlugy bes etmäge çagyrdylar.
Şu iş boýunça 8-nji iýulda geçirilen diňlenişik gününde, Bişkek şäheriniň Swerdlow etrap kazyýetiniň binasynyň golaýynda, aýal-gyzlara garşy zorlugy ýazgaryp, nobatdaky ýöriş çäresi geçirildi. Çärä gatnaşanlar Içeri işler ministri Ulanbek Niýazbekowyň işden aýrylmagyny, jynsy zorluk sebäpli aýal-gyzlary heläklemegiň bes edilmegini hem-de zorlamakda günäkärlenýänleriň jogapkärçilige çekilmegini talap etdiler.
Çeşme: Azatlyk Radiosynyň Gyrgyz gullugy
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.