Türkmenistanyň günbatarynda ýer titredi
28-nji iýulda Türkmenistanyň günbatarynda 4,3 magnitudaly ýer titreme hasaba alyndy. Bu barada Volcano Discovery saýty habar berýär.
Ýerli wagt bilen ir sagat 7:17-de ýüze çykan ýer sarsgynynyň episentri Türkmenbaşy şäheriniň 22 km demirgazyk-gündogarynda ýerleşdi we onuň çuňlugy 10 km-e deň boldy.
Ýer sarsgynynyň netijeleri barada maglumat ýok.
Soňky aýlarda Türkmenistanyň günbatar sebitlerinde birnäçe ýer sarsgyny hasaba alyndy.
Türkmen häkimiýetleri 28-nji iýulda ýüze çykan ýer sarsgyny bilen birlikde, ýurtda bolýan tebigy betbagtçylyklar we olaryň ilata ýetirýän täsirleri barada habar bermekden ýyllarboýy saklanyp gelýärler.
Türkmenistan 9 baldan ýokary seýsmiki aktiw ýerde ýerleşýär.
1948-nji ýylyň oktýabr aýynda Aşgabatda ýurduň taryhyndaky iň weýrançylykly ýer titreme boldy. Tutuş şäher tas ýer ýüzünden süpürildi, 100 müňden gowrak adam wepat boldy.