Казанда «Корбан Фест» бәйрәме була
28 июньдә 17.00-20.00 сәгатьләрдә Иске Татар бистәсендә «Корбан Фест» бәйрәме була. Ул Корбан бәйрәменә багышлана. Бу хакта оештыручылар хәбәр итә.
«Корбан Фест» Татарстан башкаласында алтынчы тапкыр үткәрелә һәм анда ел саен 5 меңнән артык кеше җыела. 2023 ел Укытучылар һәм остазлар елы дип игълан ителде. Шул сәбәпле, чараның төп темасы мәгариф өлкәсендә фәнни ачышларны сакларга һәм арттырырга ярдәм иткән татар укытучыларының мирасы була.
Чара кунакларын интерактив концерт программасы көтә. Сәхнәдә мөнәҗәт башкаручылар, бию студияләре, футбол фристайлы буенча Россия чемпионнары, акробатлар командасы чыгыш ясаячак. Бәйрәм азагында театраль йөреш була. Актерлар кареталарда һәм машиналарда танылган галимнәр, дин әһелләре һәм укытучылар образларында йөреп уза.
Балалар зонасы да оештырыла, анда актив уеннар, Кабан күлендә катараманда йөрү конкурсы, фотозона, фудкорт була. Программага мастер-класслар һәм сәүдә нокталары, өлкәннәр өчен актив уеннар, эстафета, акробатлау чыгышы, футбол буенча фристайл шоу, концерт программасы, аш-су тамашасы, актерлар чыгышы кертелгән.