Вучиќ: Државата нема да дозволи насилство

Државата нема да дозволи насилство и ќе реагира многу брзо и ефикасно, порача српскиот претседател Александар Вучиќ во обраќањето на ТВ Пинк, откако полицијата ги спречи десничарските активисти собрани пред Претседателството на Србија да влезат во зградата.

„Државата нема да дозволи насилниците и екстремистите, со каква било помош однадвор, од Запад или од Исток, да го загрозат уставниот поредок“, рече Вучиќ.

Истиот ден, како што изјави, имал итна средба со српските безбедносни служби.

„Ја анализиравме состојбата на јавниот ред и мир, работите се целосно под контрола и затоа луѓето треба да бидат мирни“, рече Вучиќ и додаде дека „сите што се заканувале со убиство, тепање луѓе“ ќе одговараат пред надлежните државни органи.

Вучиќ имаше вонредно обраќање по протестот што пред Претседателството на Србија го организираше десничарската организација „Народна патрола“, која јавно зборува за нејзините врски со руските паравоени сили од формацијата „Вагнер“.

Со протестот што го организираа на Денот на српската државност, кој се одбележува секој 15 февруари, тие го изразија своето несогласување со политиката на државата кон Косово. Дел од учесниците на состанокот извикуваа навредливи и заканувачки слогани против претседателот на Србија, барајќи оставка од него.