Тајван пронајде метеоролошки балон, „најверојатно кинески“

Војската на Тајван соопшти дека пронашла остатоци од соборен метеоролошки балон веројатно од Кина на оддалечен и стратешки важен остров во близина на кинескиот брег, во услови на спор меѓу Кина и Соединетите Држави  за балони и шпионажа.

Тајван, за кој Кина тврди дека е нејзина територија, во последниве години се жали на зголемено вознемирување од страна на вооружените сили на Пекинг, вклучувајќи борбени авиони и беспилотни летала кои летаат во близина на островот.

Тајванската војска соопшти дека доцна утрото нејзините сили на островот Донџин, дел од архипелагот Матсу под контрола на Тајван во близина на брегот на кинеската област Фужоу, забележале непознат објект како паѓа од небото и подоцна пронашле остатоци од балон.

Балонот е со дијаметар од околу еден метар со кутија со инструменти означена со поедноставени кинески знаци кои се користат во Кина, но не и во Тајван.

„Прелиминарната истрага утврди дека станува збор за остатоци од инструмент за откривање на метеорологијата, кои соодветните оддели ги собрале за понатамошна евалуација“, соопшти тајванската војска.

Говорејќи пред новинарите во парламентот во петокот, министерот за одбрана Чиу Куо-ченг рече дека неговото министерство испратило тим да го испита урнатиот балон.

„Националната армија нема да избрзува со заклучоци врз основа на изгледот. Одговорите ќе бидат дадени дури по истрагата“, рече тој.

Министерството за одбрана на Тајван во вторникот соопшти дека не забележале кинески балони за надзор во негова близина. Спорот меѓу Пекинг и Вашингтон околу шпионските балони предизвикува загриженост поради зголемените воени тензии.