Здравствените работници си ги бараат јануарските плати

Претставници на синдикални организации на вработени во здравствениот сектор денеска напладне пред Фондот за здравствено осигурување на Македонија (ФЗОМ) ќе побараат исплата на платите за јануари и ќе информираат за следните чекори доколку не ги добијат парите во текот на денов.

Јануарските плати на вработените во здравството доцнат поради хакираниот систем на Фондот. Кој прекина со работа на 6 февруари откако беше цел на сајбер-напад.

ФЗОМ во четвртокот побара сите јавни здравствени установи да достават податоци за вработените за да може да им се исплати плата.

Најави за протест поради неисплатените плати има од докторите, сестрите, болничарите и останатиот медицински кадар од ГОБ „8 Септември“ и Клиничкиот центар „Мајка Тереза“, како и од други здравствени организации низ земјава.

Министерот за финансии Фатмир Бесими најави дека доколку до понеделник не се реши проблемот, платите за здравствениот кадар ќе се обезбедат од Централниот трезор, а потоа ќе се порамнат со трезорот на Фондот за здравствено осигурување.

Освен што здравствените работници немаат плата за јануари, поради хакираниот систем на Фондот, доцнат и исплати на боледувања, породилно отсуство, рефундации за лекови.