Младите незаинтересирани за пекарската струка, ќе нема кој да прави бурек

Иако платите растат, компаниите од пекарската индустрија се соочуваат со проблеми поради недостиг на квалификуван кадар. Велат дека младите немаат интерес за ова, ниту пак сакаат да отворат пекарници. Како што покажува најновата анализа на Стопанската комора, просечната старост на вработените е 57 години.

Дополнителeн проблем е и тоа што процесите не може да се автоматизираат, за да се компензира кадарот.

„Во големата пекарска индустрија најмногу недостигаат месачи, обликувачи на тесто и пекари, а во малата и микропекарска индустрија пекари и бурекчии. Проблемот е сериозен и треба системски и институционално да се решава. Една од опциите е да се предвиди субвенционирање на работодавачите или работниците кои ќе ги одберат овие занимања во пекарската индустрија зашто идниот период може да дојде до блокада во работењето и до зголемување на цените на секојдневните пекарски производи и печива од рачна изработка“, истакна Наташа Јаневска од Комората.

Комората најавува поддршка за своите членки преку преквалификација и доквалификација за бараните вештини. Според Игор Стојановски, сопственик на пекарница, проблемот е сериозен, проблемот со немањето кадар во пекарската индустрија е исклучително сериозен иако смета дека платите за бурекџиите се скоро изедначени со тие во Германија. Појаснува дека просечна плата во оваа индустрија е над 30 000 денари, а достигнува и до 60 000, како и дека постојано расте.

Анализата на Стопанската комора покажала дека 82 отсто од компаниите се обиделе да обезбедат кадар со потребни вештини, но не успеале во целост. Речиси половината причината ја гледаат во ограничениот број кандидати со соодветни квалификации и работно искуство.