Россия бўйлаб Навальний ҳимоясига намойишлар бўлиб ўтмоқда
Алексей Навальний 31 мартдан буён Владимир вилоятидаги ИК-2 колониясида мустақил тиббий кўрик ўтказиш талаби билан очлик акциясини ўтказмоқда. У баданидаги оғриқлардан шикоят қилган. Навальнийни даволаётган шифокорларга кўра, унинг ҳолати ҳаётига таҳдид соладиган даражада ёмон. Навальнийнинг ўзи адвокати орқали Инстаграмда эълон қилган постида "Камерада скелет қалтираб юргани"ни айтган.
Россиядаги 70 дан ортиқ хайрия ташкилотлари Навальнийга шошилинч тиббий ёрдам кўрсатиш ҳақидаги мурожаатни имзолашди.
100га яқин одам Навальний билан бирдамлик белгиси сифатида очлик эълон қилган. Жаҳондаги кўплаб сиёсатчилар, маданият арбоблари, жумладан Нобель мукофоти соҳиблари ва Голливуд юлдузлари Навальний ҳимоясига чиқишган. Улар Путиндан мухолифатчига шошилинч тиббий ёрдам кўрсатилишини сўрашмоқда.
Навальнийнинг соғлиги билан боғлиқ хавотирлар манзарасида сафдошлари 21 апрель куни Россия бўйлаб унинг ҳимоясига шошилинч намойишлар ўтказилишини эълон қилишган.
Шу куни президент Владимир Путин Россия парламентининг юқори палатаси бўлган Федерал Кенгашга анъанавий мурожаат билан чиқмоқда. Бу унинг президентлиги давридаги 17 - мурожаатидир.
21 апрель куни Россия шаҳарларида мухолифатчи Алексей Навальний ҳимоясига норозилик акциялари бўлиб ўтмоқда.
Кўплаб шаҳарларда ҳар икки томон - Навальний тарафдорлари ва ҳокимият намойишларга тайёргарлик кўраётган бўлса, бошқа шаҳарларда намойишлар аллақачон бошланиб кетган.
Иркутскда намойишчилар "Путин ўғри!" дея ҳайқиришмоқда.
Пойтахт Москванинг кўча ва майдонларида эса тўсиқлар кўпайган.
Навальнийнинг рафиқаси Юлия Навальная Инстаграм саҳифасига янги пост қўйди.
Петропавловск-Камчатскда бошланган акцияда 40 га яқин маҳаллий аҳоли вакиллари тўпланган. Акция қатнашчилари олдига полиция ходимари келган, аммо улар билан мулоқот тинч ўтгани хабар қилинмоқда.
Магадандаги Навальний тарафдорларининг намойишида эса камида 8 одамнинг ҳибсга олингани хабар қилинмоқда.
Намойишлар Жанубий Сахалин ва Хабаровск шаҳарларида ҳам ўтмоқда. Владивостокда маҳалий аҳоли вакиллари шаҳарнинг бош майдонида бир кишилик пикетлар ўтказишмоқда. "Сибирь.Реалии" нашри мухбири намойишчилар сони 100 киши эканини айтмоқда.
Хабаровскда бошланган митингда намойишчилар "Навальнийга врач беринг!" деган шиорни кўтаришган. Аксар намойишчилар Ленин майдонида тўплангани хабар қилинмоқда. Акция бир неча бор шаҳарнинг турли жойларига кўчирилган.
Намойишлар арафасида полиция Навальний тарафдорларини ҳибсга олган, уйларнинг уйларида тинтув ўтказган.
21 апрель куни эрталабдан Россиянинг қатор шаҳарларида фаоллар ва журналистлар қўлга олиниб, уларнинг уйларида тинтув ўтказилмоқда. Алексей Навальний тарафдорлари бугун йирик шаҳарларда уни қўллаб-қувватлаб норозилик намойишига чиқишни режалаштирган.
Москва ҳукумати пойтахтда оммавий тадбирларга қўйилган чекловлар боис Навальний тарафдорларининг Манеж майдонида 100 минг кишилик митинг ўтказишга рухсат бериш ҳақидаги сўровини рад этган.
21 апрель куни эрталаб Москвада “Автозаводская” метро бекати ёнида мухолифатчининг сафдоши Любовь Соболь ҳибсга олинди. Бу ҳақда твиттерда унинг адвокати Владимир Воронин маълум қилди. Унинг айтишича, полициячилар уни таксидан “суғуриб олиб”, Донская тумани ИИБга элтишган ва айни пайтда микроавтобус ичида сақлаб туришибди.
Навальнийнинг матбуот котибаси Кира Ярмиш ҳам Москвада, ўз уйи яқинида қўлга олинган. Адвокати Вероника Поляковага кўра, воқеа Ярмиш терговчи томонидан рухсат этилган соат 10 дан 11 гача вақт оралиғида кўчага чиққан чоғида юз берган.
Соболь ва Ярмиш январь ойида Алексей Навальнийни қўллаб-қувватлаш мақсадида ўтказилган норозилик намойишларидан сўнг “санитария иши” бўйича терговга тортилган. Уларни санитария-эпидемиология қоидаларини бузишга қасд қилишда айблашмоқда.
Санкт-Петербургда полиция камида олти фаолнинг уйида тинтув ўтказди. Улар орасида “Весна” ҳаракати координаторлари Евгений Затеев ҳамда Валентин Хорошин ҳам бор. “Норозилик апологияси” лойиҳаси маъумотига кўра, тинтувлар январь ойидаги намойишлар чоғида йўллар ёпиб қўйилгани бўйича очилган жиноят иши билан боғлиқ. Фаолларнинг мазкур ишдаги процессуал мақоми ҳозирча номаълум.
“ЯГражданин” платформаси муҳаррири Александр Бабушкиннинг уйида ҳам тинтув ўтказилган. Бу вақтда у ишда бўлган, уйда қариндошлари қолган. Бабушкиннинг ноутбуки мусодара қилиниб, ўзи сўроққа чақирилгани айтилмоқда.
“Фонтанка” мухбири ва “Ротонда” телеграм-канали муаллифларидан бири Ксения Клочкованикига полиция Навальнийнинг Петербургдаги штаби ходими Денис Кабаковни излаб келган, у илгари шу квартирада яшаган экан.
Навальнийнинг Петербургдаги штаби фаолларидан Илья Гантварг эса уйи икки марта тинтув қилингани ҳақида хабар берган.
“Ўқитувчилар альянси”нинг Петербург бўлинмаси етакчиси Даниил Кеннинг уи тинтилиб, ўзи полиция маҳкамасига олиб кетилган.
Москвада полиция SOTA нашри журналисти Сергей Куокнинг уйига келиб, уни 21 апрелга белгиланган митингда иштирок этишнинг ҳуқуқий оқибатларидан огоҳлантирган.
Курган шаҳрида Навальнийнинг маҳаллий штаби ходимаси Софья Лопатинани ҳибс қилишди. Шунингдек, яқинда қўлга олинган ушбу шаб координатори Алексей Шварцнинг қиз ўртоғи Дарья Левкинани ҳам.
Нижний Новгородда Роман Тимченко қўлга олинган. “ОВД-Инфо” маълум қилишича, бунга 21 апрель акциялари ҳақида “Вконтакте” тармоғида хабар қолдиргани асос қилиб кўрсатилган.
Ростов-Донда полиция Навальний штаби фаоллари — Вадим Кобзев ҳамда Екатерина Верешагинани қўлга олган.
Иркутскда, митинг бошланишидан анча аввал полиция сар қилиб юрган маҳаллий фаол Вячеслав Воробейни ҳибсга олган. У, умумроссия норозилик намойишлари эълон қилинишидан олдин ижтимоий тармоқларда эълон қилган видеоси туфайли митинглар ташкил қилишда айбланиши мумкинлиги айтилмоқда. Видеоёзувда Воробей одамларни Навальнийни қўллаб-қувватлаш учун кўчага чиқишга чорлайди.
Красноярскда яшовчи Александра Письман 20 апрель куни кечқурун полиция томонидан қўлга олинганидан бери у билан алоқа узилган, деб хабар бермоқда “ОВД-Инфо”. Фаол ўзининг “Фейсбук”даги саҳифасига “Полицияга олиб боришди. Экстремистик бир балони ёпиштиришмоқчи. Эртанги акция ҳақида ёзганим учун. Бошланди”, деб хабар қолдиришга улгурган.
Навальний тарафдорлари, 31 мартдан бери қамоқхонада очлик сақлаб келаётган сиёсатчини қўллаб-қувватлаб умумроссия намойишини эълон қилишган. Навальний, унинг ҳузурига мустақил врач киритилишига эришмоқчи. Аввалроқ унинг врачлари, Навальнийнинг саломатлиги тезда путурдан кетаётганини айтишганди.
Россия Бош прокуратураси ва ИИВ фуқароларни оммавий тартибсизликлар тўғрисидаги жиноий модда билан таҳдид қилиб, рухсат этилмаган митингларда қатнашишдан қайтармоқда.