Облыс әкімі Жамбыл ауданындағы әлеуметтік нысандардың құрылысымен танысты
Облыс әкімі Бердібек Сапарбаев Жамбыл ауданына жұмыс сапарымен барды. Аудан халқын алаңдатқан ауыз су мәселесінен бастап, газ, жол, баспана және жаңа оқу жылына мектептердің даярлығын пысықтап, дәрігерлердің де жайын білді, — деп хабарлайды «ZhambylNews» ақпараттық агенттігі. Облыс әкімі жұмыс сапарын осы ауданға қарасты Шайқорық ауылынан бастады. Мұнда өңір басшысы ауыз су мұнарасының жұмысымен танысты. Айта кетсек, бұған […]
Сообщение Облыс әкімі Жамбыл ауданындағы әлеуметтік нысандардың құрылысымен танысты появились сначала на ZhambylNews АҚПАРАТ АГЕНТТІГІ.
Облыс әкімі Бердібек Сапарбаев Жамбыл ауданына жұмыс сапарымен барды. Аудан халқын алаңдатқан ауыз су мәселесінен бастап, газ, жол, баспана және жаңа оқу жылына мектептердің даярлығын пысықтап, дәрігерлердің де жайын білді, — деп хабарлайды «ZhambylNews» ақпараттық агенттігі.
Облыс әкімі жұмыс сапарын осы ауданға қарасты Шайқорық ауылынан бастады. Мұнда өңір басшысы ауыз су мұнарасының жұмысымен танысты. Айта кетсек, бұған дейін ауыз су мәселесі ауыл халқының жанына батқан мәселенің біріне айналған-тұғын.
— Шайқорық су жүйесі 5 елді мекенді қамтиды. 1290 абонент бар. Қазіргі жағдайда тұрғындардың тоқсан пайызы ауыз суды тұтынуда. Әзірге су халыққа уақытпен, яғни сағат 12:00-ден 15:00-ге дейін берілуде. Өйткені елді мекендер балансқа алынғанымен судың тарифі әлі алынған жоқ. Су қоймасы жуырда іске қосылды. Мұнда мың куб су бар. Толығымен қамтылу халықтың өзіне байланысты. Себебі су әрбір тұрғынның үйіне дейін жеткізілген. Ал, су қоймасында қазір 3 адам тәулік бойы жұмыс жасауда. Штат бекітілгенде мұнда он бес адам жұмыс жасайтын болады,- дейді облыстық «ҚазСуШар» РМК Жамбыл филиалының басшысы Қазыбек Бедебаев.
Бердібек Машбекұлы құны 1,5 миллиард теңгеге жетіп жығылатын жаңа су жүйесі бола тұра жергілікті халықты тіршілік көзімен небәрі үш-ақ сағат қамтамасыз етуге болмайтынын, бұл өте аз көрсеткіш екенін ескертіп, судың сапасын бақылауды, ол үшін жұмысты жүйелеп, тұрғындармен бірге істі ілгерілетуді тапсырды.
Ал ауылдық округ әкімі Бақыт Садырбаевтың айтуынша мұнда 7 мыңнан аса тұрғын бар. Шайқорық ауылдық округінде 28 көшеге жөндеу жұмыстары жүргізілуде. 24 көшеге 237 миллион теңге және жергілікті бюджеттен 86 миллион теңге 4 көшеге бөлінген. Бүгінгі күнге 7 көшенің жұмысы аяқталған. Б.Сапарбаев жолдың сапасын басты назарда ұстауды тапсырды.
Сондай-ақ мердігерлер екі жыл кепілдік беріп отыр және өздері салып жатқан жол кемінде 5 жыл ел игілігіне жарайды деп сендірді. Ал аудан әкімі Сәкен Арубаев жаңа жолдың сапасы арнайы зертханалық сынамадан өтпейінше қабылдап алмаймыз деді.
Бүгінде ауылдық округ мәдениет үйі, пошта секілді әлеуметтік нысандармен қамтылған. 1974 жылдан бері талайға қара танытқан Шайқорық орта мектебіне осыдан үш жыл бұрын ғана күрделі жөндеу жұмыстары жүргізіліпті. Ауылдық округ әкімінің айтуынша мектепке су кіргізілген, кәріз жүйесіне де қосылған. Білім ұясы 640 орынға арналған.
Алайда аталмыш мектепке бас сұққанда ауладағы спорт алаңшасының сұлбасы сын көтермеді. Ашығын айтқанда мектеп ауласы көрген көзге қараусыз қалғандай әсер қалдырды. Облыс әкімі оқу жылына дайындықты пысықтауды, ауладағы абаттандыру жұмыстарын дереу қолға алуды тапсырды. Мектеп директоры Алма Джатқанбаеваның айтуынша, өткен оқу жылында 52 түлек бітірген мектептің табалдырығын биыл 125 бала аттайды деген болжам бар.
— Қашықтықтан оқуға дайындалып жатырмыз. Бастауыш, жоғарғы сыныптар да қашықтан оқытылады. Бірақ бірінші сыныпқа келетін бүлдіршіндердің ата-аналары қашықтан оқуға ойланып отыр, — деген мектеп директоры мектептің асхана, акт залы, спорт залымен де таныстырып өтті.
-Мен білім басқармасына тапсырма бергенмін. Мүмкіндігіне қарай бірінші сыныптың балаларын дәстүрлі түрде оқыту керек. Бала мұғалімді, сыныпты, тақтаны сезінуі қажет. Қашықтан оқытылса іргетасы солай қаланып қалады. Сонымен қатар бұл мектептен 46 жылдан бері қаншама азамат түлеп ұшты. «Tylek.kz» сайтында сол түлектердің барлығының мәліметі, жетістіктері болуы қажет және олармен байланыста болуларыңыз керек,-деді облыс әкімі.
Бірақ, Шайқорық орта мектебінен қазір Tylek.kz сайтына бар-жоғы он түлек тіркелген көрінеді.
Бұдан кейін облыс әкімі Аса ауылындағы жаңадан бой көтерген спорттық-сауықтыру кешенінің құрылысымен жан-жақты танысты.
— Әмбебап спорттық кешеннің құрылысы былтырғы жылы қыркүйек айында басталған болатын. Келісім шарт бойынша ағымдағы жылдың қараша айында аяқталуы тиіс. Алайда мердігер «Өмірзақ» ЖШС-і құрылысты қыркүйек айында толық аяқтаймыз деп отыр. Жұмсалған қаражат келісім шарт бойынша 507 миллион теңге. Қазіргі кезде ішкі әрлеу жұмыстарының барлығы біткен. Жалпы жұмыстың 80% -ы аяқталып отыр. Аудан көлемінде мұндай құрылыс нысаны бұрын-соңды болған емес. Кешеннің ішінде баскетбол, волейбол, тренажер залы, бокс, күрес залдары бар. Оған қосымша жаттықтырушылар мен медицина маманы отыратын арнайы бөлмелер қарастырылған. Ауласында да футбол, теннис, волейбол, баскетбол алаңшалары бар. Құрылыс жұмыстарын толығымен жергілікті азаматтар атқаруда. Қазір тек жарықтандыру мен абаттандыру жұмыстары ғана қалды, — дейді аудандық сәулет, қала құрылысы және құрылыс бөлімінің басшысы Қайрат Тілеубаев.
Сондай-ақ, облыс әкімі спорт кешенінің жұмыстары аяқталғаннан кейін оның сыртына ел абыройын асқақтатқан танымал спортшылардың суреттерін ілуді тапсырды.
Бұдан кейін Бердібек Машбекұлы қайта жаңғыртудан өткен аудандық шығармашылық орталыққа бас сұқты.
Аудандық білім бөлімінің басшысы Раушан Қожамжарованың айтуынша, білім мен ғылымды дамыту мақсатында қолға алынған жоба аясында іске асқан орталық алты бағыт бойынша жұмыс жасауда. Онда химия, биология, қолданбалы өнер, алғашқы медициналық көмек, аспазшы кондитерлік, автомоделдеу секілді қажетті салалар қамтылған. Орталық қазір Б.Момышұлы атындағы мектеп-гимназиясының аумағында орналасқан. Осы ретте өңір басшысы мектеп-гимназиясына да ат басын бұрды. Аталған білім ұясының табалдырығын биыл 60 бала аттағалы отыр екен.
Облыс әкімі мектептің қасбетін, ауласын жөндеуді тапсырды.
Аймақ басшысы денсаулық сақтау саласын да назардан тыс қалдырған жоқ. Аудандық ауруханаға арнайы ат басын бұрып, ақ халатты абзал жандармен жүздесті.
-Бізге күніне 40 шақты адам қайырылады.Тегін дәрі дәрмектер жеткілікті. Індетке байланысты дәрілер де қорымызда бар. Нақты айтқанда қордағы дәрі қазір екі аптаға жетеді. Карантинге байланысты аудан бойынша 14 мобилдік топ жұмыс жасайды. Оған қажетті көлікті аудан әкімшілігі бөліп отыр. Науқастар үй жағдайында да ем алуда. Егер науқаста індеттің белгілері байқалса 60 орындық провизорлық бөлімге жатқызылады. Ал егер симптом анықталса қалаға жеткізіледі. Нақты уақытта 87 дәрігер жұмыс жасайды. Бірақ дәрігерлер жетіспеушілігі бар. Дегенмен қажеттілікті жас мамандармен толықтырып жатырмыз,-дейді ауданның бас дәрігері Алтай Саурықов.
Мәселен жас маман Ержан Төребеков ауданның тумасы екен. Қазіргі таңда ол аудандық емханада оташы дәрігер болып еңбек етуде. Түркістандағы А.Яссауи атындағы университетті хирургия мамандығы бойынша аяқтаған бойда осында жұмысқа тұрған. Мемлекет тарапынан көтерме жәрдемақы алып, үй алған. Ал Астана медициналық университетінің түлегі Жандос Омарбайұлы осымен екінші жыл аудандық емханада терапевт дәрігер болып жұмыс жасап жүр. Ол да мемлекеттің мүмкіндігін тиімді пайдалануда. Жас маманның қазіргі жалақысы 200 мың теңге көлемінде. Сол секілді Алматыдағы Асфендияров атындағы Қазақ ұттық медицина университетінде білім алған ауданның тумалары да осы емханада еңбек етуде. Соған қарамастан ауданда әлі де окулист, лор дәрігер, невропотолог, ренгенолог мамандары жетіспейді екен. Сондықтан облыс басшысы жас мамандарды ауданға көбірек тартуды тапсырды.
Аудандық емханада қазіргі таңда 2 цифлық ренген аппараты және жүрек аппараттары бар. Бірақ компьютерлік томография жоқ. Бердібек Машбекұлы сол бағытта жұмысты күшейтуді айрықша атап өтті.
Ал, аудандық аурухананың провизорлық бөлімінде 28 науқас емделіп жатыр екен. Жансақтау бөлімінде жатқан бір науқастың жағдайы бірқалыпты. аудандық ауруханада бір жеті бұрын 60-тан аса адам провизорлық бөлімде, ал жан сақтау бөлімінде 4 адам өмір үшін күрескен. Көңілге медет болатыны, ауданда соңғы екі аптада адам шығына болмаған. Айта кетейік, ауруханада 3 өкпені жасанды желдеткіш аппараты бар. Облыс әкімі жансақтау бөлімінде қанша төсек болса, сонша ӨЖЖ аппараты болуы қажет деп тапсырды.
Одан кейін облыс әкімі Қаракемер ауылындағы мәдениет үйінің құрылыс жұмыстарымен танысты. Айталық, бұрын-соңды бұл ауылда мәдениет үйі болмаған. Сондықтан бұл халықтың көптен күткен қуанышы. Қуаныш десек артық болар, жұбанышқа айналатын түрі бар. Себебі Мердігері «ҚазМұнайҚұрылыс» жауапкершілігі шектеулі серіктестігі торғайдың ұясындай жерге тоқсан адамды сыйдырмақшы екен.
— Екі мыңнан аса халыққа мұндай шағын мәдениет үйі салынып жатыр деген естіген елден ұят. Елге күлкілі болғанша мұндайды салмай-ақ қою керек. Концерт келді дейік, 100 адам да сыймайды ғой мына жерге. Бекерге ақшаны желге шашып жатсыздар,-деп облыс әкімі сын тезіне алды.
Көңілге қуаныш ұялатқан сол ауылдың жастары деп айтсақ артық болмас. Қаракемерде жастар арасында күрес, футбол жақсы дамып келе жатыр екен. Олардың арасында алды Азияға шыққан, үш жыл қатарынан ел чемпионы атанған жастар бар. Олар жазда ауыл сыртындағы футбол алаңшасында, қыста мектептің спорт залында жаттығады. Аладоп әңгіме болғанда Бекжан Мырзатай секілді мақтаныштарын да ауылдастары жасырмай жарыса айтты. Кіші футболдан да жастар арасында республиканың екі дүркін жеңімпазы атаныпты. 2003-2005 жылғы жасөспірімдер Францияға да жолдама алған. Облыс әкімі осы ауылдан арнайы жабық спорт кешенін саламыз деп талантты жастардың төбесін көкке жеткізді. Ауыл ақсақалдары да облыс әкімінің арнайы келіп, ауылдың жайын білгеніне алғыстарын жеткізді.
Жұмыс сапары барысында Бердібек Машбекұлы Тастөбе ауылының ауылішілік газ құбыры желілерінің құырылысымен де жіті танысты. «Газ-Сервис» ЖШС-нің құрылыс монтаждау бөлімінің басшысы Ерлан Қасқарбаев биыл ауылдың ішіндегі жұмысты толық бітіреміз деп отыр.
Ал, осы Тастөбе мен жоғарыда аталған Қаракемер де Көлқайнар ауылдық округіне қарасты. Көлқайнардың өзінде де көңіл қуантарлық істің бірі 100 орындық орта мектептің құрылысы. Мердігер компания «ТаразҚұрылысИнвест» ЖШС-і жыл аяғында бүлдіршіндердің игілігіне беріледі дейді. Облыс әкімі күн суып кетпей жұмысты ертерек аяқтауды, білім нысанының қасбетіне ерекше мән беруді, сондай-ақ абаттандыру жұмыстарын да назадан шығармауды тапсырды.
Өңір басшысы аудандағы басты мәселенің бірі баспананың жайын да біліп қайтты. Бұл ретте жаңадан қазығы қағылып, іргесі тіктелген Аса ауылындағы көп қабатты тұрғын үйдің құрылысымен танысты. «Бином» жауапкершілігі шектеулі серіктестігі жүргізіп жатқан жұмыс жыл аяғында толығымен аяқталады деп күтілуде.
Осылайша облыс әкімі аудан әлеуетін көтеру үшін атқарылып жатқан жұмыстарды зерделеп, жан жақты тапсымалар берді.
Сообщение Облыс әкімі Жамбыл ауданындағы әлеуметтік нысандардың құрылысымен танысты появились сначала на ZhambylNews АҚПАРАТ АГЕНТТІГІ.