Gyrgyzystan BMG-niň Adam hukuklary geňeşine gaýtadan saýlandy
Gyrgyzystan Nýu-Ýorkda 2023-2025-nji ýyllar üçin BMG-niň Adam hukuklary geňeşine geçirilen saýlawlarda ýeňiş gazandy diýip, Gyrgyzystanyň Daşary işler ministrliginiň metbugat gullugy habar berdi.
Gyrgyz DIM-niň aýtmagyna görä, Aziýa ýurtlarynyň arasynda BMG-niň Adam hukuklary geňeşindäki orun üçin alty ýurt: Gyrgyzystan, Owganystan, Bangladeş, Wýetnam, Maldiwler we Koreýa bäsdeşlik etdi. BMG-niň agza ýurtlarynyň 126-sy Gyrgyzystanyň BMG-niň Adam hukuklary geňeşine alynmagy üçin ses berdi.
Gyrgyzystanyň BMG-niň Adam hukuklary geňeşine gaýtadan saýlanmagy, Daşary işler ministrliginde nygtalmagyna görä, ýurduň "adam hukuklary boýunça gazanan üstünlikleriniň we geljekde adam hukuklaryny goramak we ilerletmek babatdaky global kampaniýa goşjak goşantlarynyň dünýä jemgyýetçiligi tarapyndan ykrar edilmegini” aňladýar.
Mundan öň Gyrgyzystan iki gezek, 2009-2012 we 2016-2018-nji ýyllarda BMG-niň Adam hukuklary geňeşiniň agzasy boldy.