Gazagystan türkmen tebigy gazyny import eder
Gazagystanyň milli gaz kompaniýasy “QazaqGaz” we Türkmenistanyň tebigy gaz öndürijisi “Türkmengaz” Gazagystana türkmen tebigy gazyny import etmek barada şertnama baglaşdy diýip, “Biznes Türkmenistan” neşiri gazak prezidentiniň metbugat gullugynyň maglumatyna salgylanyp habar berýär.
Gazagystanyň prezidenti Kasym-Žomart Tokaýewiň altynjy gün Astanada, Türkmenistanyň prezidenti Serdar Berdimuhamedow bilen geçirilen gepleşiklerden soň geçirilen metbugat ýygnagynda aýtmagyna görä, iki goňşy ýurduň gaz pudagyndaky hyzmatdaşlygynyň geljegi barada jikme-jik maslahat edildi.
Gazak lideri iki ýurdyň gaz kompaniýalarynyň arasynda baglaşylan şertnamadan söz açyp, bu taslamany durmuşa geçirmekde beren şahsy goldawy üçin türkmen kärdeşine minnetdarlyk bildirdi.
"Biz uzak möhletleýin şertnama baglaşmak isleýäris we gaz importynyň mukdaryny ýylda bir ýarym milliard kub metre çenli artdyrmaga taýýar" diýip, Kasym-Žomart Tokaýew aýtdy.
Prezident Tokaýew Gazagystanyň Türkmenistanyň iri energiýa başlangyçlaryny durmuşa geçirmäge, şeýle-de gaýtadan işlemek we gaz himiýasy pudagynda tejribe alyşmak, özara peýdaly taslamalary işläp düzmek isleýändigini aýtdy.