«Идел» татар-башкорт мәдәни үзәге Җәләл-Абад шәһәренең 146 еллыгын бәйрәм итүдә катнашты
Кыргызстанның Җәләл-Абад өлкәсендә «Идел» татар-башкорт мәдәни үзәге иҗтимагый берләшмәсе 26 октябрь көнне Җәләл-Абад шәһәренең 146 еллыгын бәйрәм итүдә катнашты. Бу хакта Бөтендөнья татар конгрессы матбугат хезмәте хәбәр итә.
Активистлар күргәзмә-ярминкәдә бәйләнгән һәм тегелгән кул эшләре, өйдә пешкән милли камыр ризыклары, милли эчемлекләр тәкъдим итте. Шулай ук концерт программасында катнаштылар, балалар татар милли биюен башкарды.
«Идел» татар-башкорт мәдәни үзәге иҗтимагый берләшмәсе әгъзаларын Кыргызстан Президенты Садыйр Җаппаров килеп котлады. Җавап йөзеннән активистлар бәйрәмгә килүе һәм шәһәргә 50 яңа автобус бүләк итүе өчен Президентка рәхмәт белдерде, бәйрәм белән котладылар, диелә хәбәрдә.