Газа секторында һәлак булучылар саны 10 меңнән арткан
Газа секторында Якын Көнчыгыш конфликты кискенләшү башланганнан бирле 10 меңнән артык кеше һәлак булды. Бу хакта, al Arabiya телеканалы Палестина Сәламәтлек саклау министрлыгына сылтама белән хәбәр итә, дип яза Риа Новости.
«Газа секторында һава һөҗүмнәреннән һәлак булучылар саны 10 022 кешегә җитте, алар арасында 4104 бала», диелә хәбәрдә.
Израильдә 1,4 меңнән артык кеше үлгән, шул исәптән 20 россияле. Моннан тыш, төрле бәяләүләр буенча, ХАМАСта әсирлектә 200-250ләп кеше булырга мөмкин.
Мәскәү ике якны да хәрби хәрәкәтләрне туктатырга чакырды. Владимир Путин сүзләренчә, Якын Көнчыгыш кризисын җайга салу бары тик Берләшкән Милләтләр Оешмасы Иминлек советы тарафыннан расланган «ике дәүләт» формуласы (1967 елда Көнчыгыш Иерусалимда башкаласы белән чиктә бәйсез Палестина дәүләтен төзү турында) нигезендә генә мөмкин.