Сүндерелмәгән тәмәке аркасында Казанда күпкатлы йорттагы янгында 37 яшьлек ир-ат үлгән
Казанның Чуйков урамындагы тугыз катлы йортта бер бүлмәле фатирда янгын чыккан. Бу хакта хәбәр кичә килде, дип белдерде «Татар-информ»га Россия Гадәттән тыш хәлләр министрлыгының Татарстан буенча баш идарәсе матбугат хезмәте.
Ут капкан фатирдан янгын сүндерүчеләр 37 яшьлек ир-атны коткара. Зыян күрүчене «ашыгыч ярдәм» бригадасына тапшыра.
Кызганыч, әмма бер сәгать ярымнан соң ир-ат Казанның 7 нче шәһәр клиник хастаханәсендә вафат була.
Ведомствода хәбәр итүләренчә, янгын мәйданы 6 квадрат метр тәшкил иткән. Матрас һәм җиһазлар янган.
Беренчел мәгълүматларга караганда, фаҗиганең сәбәбе — тәмәке тартуда саксызлык. Ир-ат тәмәке төпчеген сүндермәгән килеш йоклап киткән, һәм бу ут чыгуга китергән.