Гадәттән тыш хәлләр министрлыгы Татарстан юлларында томан куркынычы турында кисәтте
Россия Гадәттән тыш хәлләр министрлыгының ТР буенча Баш идарәсендә республика юлларында томан куркынычы турында кисәттеләр.
Искәртеп узабыз, метеорологларның мәгълүматлары буенча, 12 ноябрьдә 18.00 сәгатьтән алып 13 ноябрь көнне 18.00 сәгатькә кадәр республикада урыны белән томан төшүе, юлның аерым участокларында бозлавык хасил булуы, шулай ук тизлеге секундына 15-18 метрга кадәр җиткән көчле җил исүе көтелә.
Автомобиль йөртүчеләргә томанга каршы фараларны сөртергә, юлларда тизлек һәм дистанция сакларга кирәклеге хакында искәрттеләр.
Ихтыяҗ туганда 112 телефонына шалтыратырга кирәк.