Рөстәм Миңнеханов Казан епархиясе руханиларын бүләкләде
Татарстан Рәисе Рөстәм Миңнеханов Казан семинариясе хезмәткәрләрен һәм Татарстан Митрополиясе руханиларын бүләкләде. Тантаналы чара бүген Казанда, Татарстан Республикасы Православие җәмәгатьчелегенең V форумында узды. Форум Казан дини семинариясенең 300 еллык юбилеена багышланган.
Чарада бөтен Россиядән рус православ чиркәве вәкилләре, шулай ук Белоруссиядән кунаклар катнашты. Моннан тыш, Казанга Чехия, Болгария, Сириянең җирле православие чиркәүләре вәкилләре килде.
Татарстан Рәисе чараның мактаулы кунагы булды һәм форумда катнашучыларны дәүләт бүләкләре һәм Рәхмәт хатлары белән бүләкләде.
Фото: © «Татар-информ», Елена Фенина
«Хөрмәтле владыкалар, Рус Православ Чиркәве рухи оешмасы вәкилләре, кунаклар һәм форумда катнашучылар, — дип мөрәҗәгать итте Рөстәм Миңнеханов форумда катнашучыларга, – Татарстанның барлык руханиларын һәм православие җәмәгатьчелеген сәламләвемә шатмын. Сезгә конструктив эшегез өчен чын күңелдән рәхмәтемне белдерергә телим. Бүген яңгыраган чыгышларда республикада православие үсешенең төп этаплары, традицион рухи-әхлакый кыйммәтләрне ныгыту чаралары, югары православие дини белеме бирүдәге казанышлар тулысынча үз чагылышын тапкан. Безнең традицион, инде бишенче форум катлаулы вакытта уза. Яңа таләпләр бездән рухи кыйммәтләребезне яклау өчен көч кую, сабырлык һәм тәвәккәллек таләп итә».
Республика Рәисе Татарстан православие тормышындагы мөһим вакыйгаларны, әйтик, Казан соборын изгеләндерү һәм башкалага бөтен Русь Патриархы Кириллның визитын билгеләп үтте. Ул шулай ук республиканың гыйбадәтханәләрне торгызуда һәм төзүдә, музейлар һәм мәгърифәтчелек үзәкләрен булдыруда актив катнашуын ассызыклады. Рәис шулай ук Татарстан митрополиясенең махсус хәрби операциядә катнашучыларга һәм аларның гаилә әгъзаларына актив ярдәм итүенә дә игътибар итте.
Чыгышыннан соң Рөстәм Миңнеханов семинария китапханәсе мөдирен, физик тәрбия җитәкчесен, галимнәр һәм укытучылар, шулай ук дини мәктәпнең башка хезмәткәрләрен «Фидакарь хезмәт өчен» Татарстан Республикасы медале белән бүләкләде. Шулай ук «ТАССР төзелүгә 100 ел» медальләре тапшырылды. Тантана ахырында Татарстан Рәисе Казан семинариясенә бүләк сертификаты тапшырды.