Казанда гимназия укучылары агулану очрагын тикшерү турында Бастрыкинга хәбәр итәчәкләр

Россия Тикшерү комитеты рәисе Александр Бастрыкин Россия Тикшерү комитетының Татарстан буенча Тикшерү идарәсе җитәкчесе Валерий Липскийга балигъ булмаганнарга имин булмаган хезмәт күрсәтү турындагы җинаять эшен тикшерү турында хәбәр итәргә йөкләмә бирде.

Хәзерге вакытта тикшерүчеләр «Иминлек таләпләренә җавап бирми торган хезмәтләр күрсәтү» маддәсе буенча җинаять эшен тикшерә.

Искәртик, кичә Казанның 28нче гимназиясендә өч балада агулану билгеләре ачыклана, аларны хастаханәгә илтәләр. Агулану турындагы беренче хәбәр кичә кич Телеграм-каналларда чыкты. Ата-аналарның берсе хәбәр иткәнчә, балаларны ашыгыч ярдәм табиблары алып киткән.

Татарстан Сәламәтлек саклау министрлыгы белешмәсе буенча, гимназиядә укучы 8 бала медицина ярдәме сорап мөрәҗәгать иткән. Авыр хәлдәге пациентлар юк.

Казан Мәгариф идарәсендә әлеге хәл турында хәбәрдар булуларын әйттеләр. Хәзерге вакытта анализ нәтиҗәләрен көтәләр. Эчке тикшерү башланган.

«Татар-информ» га Татарстан прокурорының өлкән ярдәмчесе Руслан Галиев хәбәр иткәнчә, прокуратура мәктәп укучыларының массакүләм агулануы турындагы мәгълүмат буенча тикшерү оештырган. Тикшерүне Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтнең (Роспотребнадзор) Татарстан Республикасы буенча идарәсе хезмәткәрләре дә башлады.

Тикшерүчеләр әлеге очракның сәбәпләрен, җаваплы затлар даирәсен ачыклый. Ведомство җитәкчесе җинаять эшен тикшерү һәм ачыкланган шартлар турында хәбәр итәргә йөкләмә бирде.