Ольга Павлова БРИКС саммиты турында: Казан шәһәр үсеше өчен чираттагы кертем алачак
Татарстан БРИКС саммитына Казанны төзекләндерү өчен 6,5 млрд сум акча бүлеп бирде. Ул Казанда 2024 елның октябрендә узачак. 26 маршрутны төзекләндерү һәм шәһәргә керү юлында яңа стела урнаштыру планлаштырыла. Татарстан спикерлары «Эксперт клубы» мәйданчыгында саммит уздыруның шәһәргә нәрсә бирәчәге турында фикерләре белән уртаклашты.
«Бу мөһим вакыйга, ул шәһәр һәм аның халкы үсешенә сизелерлек йогынты ясаячак. Казанның зур халыкара чаралар уздыру тәҗрибәсе бар, алар инфраструктура һәм икътисад үсешенә этәргеч булды, шулай ук «озак вакытлы уңай нәтиҗәләр»гә дә китерде», - диде педагогика фәннәре докторы, Россиянең атказанган тренеры Ольга Павлова. Ул Татарстан башкаласының 2013 елда Универсиаданы уңышлы уздыруын мисал итеп китерде.
Студентлар уеннары Казанның тормышын үзгәртте, үзеннән зур матди һәм матди булмаган мирас калдырды, диде белгеч.
«Шәһәр инфраструктурасында кирәкле үзгәрешләр анда яшәүчеләрнең тормыш сыйфатына турыдан-туры йогынты ясый һәм демография проблемаларын хәл итә ала», - диде ул.
Павлова искәрткәнчә, Казан БРИКС саммиты һәм БРИКС уеннары вәкилләрен кабул итәргә әзерләнә. Уеннар бу чара кысаларында 2024 елның җәендә узачак. Анда 60тан артык илнең катнашуы һәм спортның 25 төре буенча медальләр уйнатылуы көтелә.