Ундүрт яшьлек үсмерне шәһәр урамында көпә-көндез яшен сугып үтергән

19 августта Кемерово өлкәсендәге Прокопьевск шәһәрендә 14 яшьлек үсмерне яшен сугып үтергән, тагын бер малай имгәнгән. Бу турыда «Комсомольская правда» хәбәр итте. Баланың мәетен шаһитлар табып алган. Урынга килгән табиблар аның яшен сугудан үлүен раслаган. Бу турыда Кузбасс Катастрофалар медицинасы үзәгенең матбугат хезмәте хәбәр итә. Соңрак билгеле булганча, мәрхүм малай һәм аның 13 яшьлек дусты яшенле яңгыр вакытында урамда була. 13 яшьлек дус малай да имгәнгән, аңа табиблар ярдәме таләп ителә. «Бераздан 13 яшьлек малай янына чакыру килде. Ул яшенле яңгыр вакытында һәлак булган дусты янында була. Бу баланы хастаханәгә алып килделәр», — диелә Катастрофалар үзәге хәбәрендә. Бу фаҗигадән соң Тикшерү комитеты тикшерү эшләре башлаган. Тикшерү версиясе буенча, көндез ике үсмер урамда йөри, шул чакта яшенле яңгыр башлана. Малайлар агач артына качып тормакчы була. Шул чакта агачка яшен суга. Шаһитлар ашыгыч ярдәм чакыра, малайларның берсен коткара алмыйлар. Икенче балада электротравма була, аны хастаханәгә алып китәләр. «Фаҗига урынын карагач, бу урында электр үткәргеч линияләре һәм башка ток чыганаклары булмавы ачыкланды. Хәзерге вакытта бала үлеменең сәбәпләре ачыклана», дип аңлатканнар Россия Тикшерү комитетының Кемерово өлкәсе буенча Тикшерү идарәсендә.