Rregullatori i BE-së nis rishikimin e vaksinës ruse, Sputnik V

Rregullatori i barnave i Bashkimit Evropian thotë se ka nisur “rishikimin” e vaksinës kundër koronavirusit, të prodhuar në Rusi, Sputnik V. Ky vendim po shihet si kyç drejt miratimit për përdorim të kësaj vaksine në 27 vendet e BE-së.

Komiteti i ilaçeve i Agjencisë Evropiane të Barnave (EMA) do të rishikojë të dhënat nga studimet që po vazhdojnë të kësaj vaksine, derisa të ketë të dhëna të mjaftueshme klinike që ta miratojë përdorimin e së njëjtës, tha EMA në një deklaratë për media më 4 mars.

Muajin e kaluar, rezultatet paraprake të studimit të avancuar për këtë vaksinë u publikuan në gazetën mjekësore The Lancet. Sipas të dhënave të publikuara, administrimi i dy dozave të Sputnik V tregoi efektivitet prej 91.6 për qind ndaj pacientëve që kishin simptoma të sëmundjes COVID-19. Kjo përqindje e efektivitetit është e përafërt me efektivitetin që kanë treguar dy vaksinat e tjera, ajo e Pfizer/BioNTech dhe vaksina e kompanisë Moderna.

“Rishikimi i vazhdueshëm” ka për qëllim që të përshpejtojë procesin e miratimit të vaksinës, duke i lejuar hulumtuesit që të dërgojnë gjetjet e tyre në kohë reale, edhe para se të dhënat finale të studimeve të jenë gati.

Kjo agjenci evropiane deri më tani ka miratuar për përdorim vaksinat e Pfizer/BioNTech, Moderna dhe AstraZeneca/Oxford dhe pritet që gjatë javës së ardhshme të vendosë për miratimin ose jo të vaksinës së kompanisë Johnson & Johnson.

Po ashtu, rishikimet po vazhdojnë edhe për vaksinën CureVac dhe Novavax.

Kirill Dmitriyev, kreu i Fondit për Investime Direkte ruse – që ka financuar vaksinën Sputnik V dhe është përgjegjës për shitjen në mbarë botën – tha më 4 mars se Rusia do të jetë në gjendje që nga muaji qershor të sigurojë vaksina për 50 milionë evropianë, nëse vaksina miratohet për përdorim nga EMA.

Dmitriyev po ashtu tha se Rusia pret që disa vende evropiane gjatë këtij muaji të miratojnë vaksinën, Sputnik V.

Më herët gjatë këtij muaji, Sllovakia pranoi kontingjentin e parë me doza të Sputnik V, duke u bërë shteti i dytë i BE-së, pas Hungarisë, që ka marrë vaksina ruse, pavarësisht se kjo vaksinë ende nuk është miratuar nga rregullatori për barna i bllokut evropian.