BE siguron së shpejti mbi 200 milionë vaksina Pfizer/BioNTech

Komisioni Evropian tha se pret që, në tremujorin e dytë të këtij viti, të sigurojë mbi 200 milionë doza të vaksinës kundër koronavirusit nga kompanitë Pfizer dhe BioNTech.

Komisioni tha se dorëzimet e reja do të përfshijnë edhe 10 milionë doza që priteshin fillimisht në tremujorin e tretë dhe të katërt.

Pfizer e konfirmoi deklaratën e BE-së, në lidhje me furnizimet në tremujorin e dytë.

“Ky është një lajm shumë i mirë. Ai u jep vendeve anëtare hapësirë për të manovruar dhe ndoshta për t’i mbushur boshllëqet me furnizime”, tha presidentja e Komisionit Evropian, Ursula von der Leyen.

Në total, BE-ja ka blerë 600 milionë doza të vaksinës nga kompanitë Pfizer dhe BioNTech, përmes dy kontratave të ndara.

Blloku synon të vaksinojë së paku 255 milionë njerëz, ose 70% të popullsisë së tij të rritur, deri në fund të verës.

Ai është përballur me kritika për fushatë të ngadalshme të vaksinimit, por zyrtarët evropianë kanë fajësuar problemet me zinxhirin furnizues.

Javën e kaluar, edhe kompania britanike-suedeze AstraZeneca ka thënë se synon t’i dorëzojë BE-së 70 milionë vaksina të saj, në tremujorin e dytë.

AstraZeneca, megjithatë, është duke hasur në probleme, pasi disa shtete evropiane dhe të tjera kanë pezulluar përdorimin e vaksinës së saj, për shkak të disa raporteve se ajo shkakton mpiksje gjaku.

Organizata Botërore e Shëndetësisë ka thënë se nuk ka prova se vaksina lidhet me mpiksjen dhe ka rekomanduar vazhdimin e përdorimit të saj.