Kurti në konsultime me komunitetet për qeverinë
Ushtruesja e detyrës së presidentit, Vjosa Osmani dhe lideri i Lëvizjes Vetëvendosje, Albin Kurti kanë vazhduar të martën takimet konsultative me përfaqësuesit e komuniteteve në Kosovë lidhur me krijimin e institucioneve të reja.
Dy përfaqësuesit e komunitetit turk që kanë fituar ulëse në Kuvendin e Kosovës nga zgjedhjet parlamentare të 14 shkurtit, ende nuk kanë vendosur nëse do të votojnë qeverinë e re të Kosovës.
Fikrim Damka, kryetar i Partisë Demokratike Turke, pas takimit me liderin e Lëvizjes Vetëvendosje, Albin Kurti, dhe ushtruesën e detyrës së presidentit Vjosa Osmani, tha se ai bashkë me deputeten tjetër nga rradhët e këtij komuniteti do të qëndrojnë në sallë për votimin e presidentit, mirëpo bisedimet për votimin e qeverisë së re do të vazhdojnë deri të premten.
Ai tha se ky komunitet kërkon një post ministror si dhe i kanë parashtruar edhe disa kërkesa tjera. Sipas Damkës, në takim është diskutuar edhe një lidhje me hapjen e ambasadës së Kosovës në Jerusalem. Turqia e ka kritikuar Kosovën për këtë veprim.
Hapja e Ambasadës së Kosovës në Jerusalem derivon nga Marrëveshja e 4 shtatorit, 2020 në Uashington për normalizim ekonomik. Hapja e saj pason vendosjen e marrëdhënieve diplomatike mes Kosovës dhe Izraelit.
Damka tha se qeveria e ardhshme do të ballafaqohet me këtë sfidë.
"Ne do ta përcjellim këtë sfidë në qeverinë e ardhshme, por varet nga vullneti i saj si do të veprojë për këtë cështje, por ne si dy deputetë do të jemi pranë që të ketë zgjidhje të përbashkët me BE-në, OKB-në, vendet tjera dhe Turqinë në lidhje me ambasadën", tha Damka pas takimit me Kurtin dhe Osmanin.
Emilija Rexhepi nga partia boshnjake "Partia e re demokratike", tha pas takimit se do ta përkrahë Qeverinë Kurti 2, si dhe zgjedhjen e Osmanit për presidente. Rexhepi ka fituar një mandat në Kuvendin e Kosovës.
Ndërkaq, Rasim Demiri nga koalicioni Vakat, tha se ata asnjëherë nuk kanë qenë pengesë në formimin e institucioneve të reja. Megjithatë, Demiri, tha se ata kanë disa kërkesa për komunitetin boshnjak.
Sipas Demirit, përfaqësuesit e këtij koalicioni do të takohen dhe do të marrin një qëndim e më pas do të takohen sërish me Kurtin, për të diskutuar për kërkesat e tyre. Megjithatë, ai theksoi se këto kërkesa, nuk janë kushte për qeverinë e ardhshme.
"Javën e ardhshme ne po presim që të kemi tri votime: votimin e kuvendit, qeverisë dhe presidentit", tha Demiri, i cili theksoi se as në rastin për zgjedhjen e presidentit, nuk do të bëhen pengesë.
Ndërkaq, Duda Bale, deputete e zgjedhur nga partia nga komuniteti boshnjak, Unioni Socialdemokrat, tha se ajo do ta votojë edhe qeverinë, por edhe për zgjedhjen e Osmanit në postin e presidentit.
“Menjëherë kemi marrë dritën e gjelbër për kërkesat që kam pasur për boshnjakët këtu në Kosovë, por edhe për të forcuar lidhjet edhe me boshnjakët në Bosnje dhe ata në shtetet e rajonit”, tha Bale, pas takimit konsultativ .
Edhe deputeti i zgjedhur Elbert Krasniqi nga radhët e komunitetit egjiptian është shprehur se do të votojë qeverinë e re si dhe Vjosa Osmanin për presidente.
Qazim Rrahmani nga Partia e Ashkalinjëve për Integrim, pas takimit me Kurtin dhe Osmanin tha se kërkojnë që sa më shpejt të formohen institucionet e reja. Ai tha se ata kanë kërkuar që të jenë pjesë e qeverisë, por nuk tregoi nëse kjo parti ka kërkuar post të ministrit.
“Për presidentin, patjetër”, tha Rrahmani kur u pyet nëse do ta votojnë Osmanin për presidente të ardhshme të Kosovës.
Osmani dhe Kurti të hënën zhvilluan takime konsultative me krerët e Partisë Demokratike dhe të Aleancës për Ardhmërinë e Kosovës, lidhur me formimin e institucioneve të reja, pas zgjedhjeve të 14 shkurtit. Ndëkaq, për të premten është paraparë edhe takimi me kryetarin e Lidhjes Demokratike të Kosovës, Lumir Abdixhikun.
Pas certifikimit të rezultatit zgjedhor të zgjedhjeve të parakohshme parlamentare të 14 shkurtit, në të cilat partia e Kurtit shënoi fitore bindëse, për 22 mars është caktuar mbajtja e seancës konstituive të legjislaturës së tetë të Kuvendit të Kosovës.
Përveç konstituimit të kuvendit dhe zgjedhjes së qeverisë, deputetët duhet të zgjedhin edhe presidentin e ri të vendit.
Në zgjedhjet e 14 shkurtit, Lëvizja Vetëvendosje ka fituar mbi 50 për qind të votave, duke siguruar 58 ulëse në Kuvend. Partia Demokratike e Kosovës do t’i ketë 19 deputetë, Lidhja Demokratike e Kosovës 15, ndërsa Aleanca për Ardhmërinë e Kosovës tetë.
Nga komunitetet, Lista Serbe i ka fituar të dhjetë ulëset e garantuara; dy ulëse i ka fituar Partia Demokratike Turke e Kosovës dhe nga një ulëse kanë fituar Koalicioni Vakat, Partia e Re Demokratike, Partia Gorane, Iniciativa e Re Demokratike e Kosovës, Partia e Ashkalinjëve për Integrim, Iniciativa Rome, Lëvizja Përparimtare e Romëve të Kosovës dhe Unioni Socialdemokrat.