ЕУ одобри нова одбранбена стратегија со 5.000 војници

Европската унија одобри нова одбранбена стратегија со која ќе го зголеми капацитетот на блокот за дејствување, вклучително и формирање сили за брза реакција од 5.000 војници. Планот, кој се подготвуваше две години, беше преработен во последен момент за да се зголеми фокусот на заканата од Русија откако Москва ја нападна Украина.


„Ова не е одговор на украинската војна, но е дел од одговорот. Кога почнавме да работиме, не можевме да замислиме дека во последниот момент пред одобрување ситуацијата ќе биде толку лоша и дека Европа ќе се соочи со толку голем предизвик“, рече шефот за надворешна политика на ЕУ, Жозеп Борел на состанокот на министрите за надворешни работи и одбрана на блокот.



Состанок на министрите за надворешни работи и за одбрана на ЕУ за Украина


Лидерите на ЕУ го опишаа рускиот напад врз Украина како повик за будење дека 27-те нации треба да заземат помускулест пристап кон нивната безбедност.


Воениот сојуз предводен од САД, НАТО со децении обезбедува основа за европската одбрана, а војната во Украина го зајакна инстинктот кај многу членки на ЕУ да го задржат Вашингтон поблиску. Но, исто така, имаше притисок предводен од Франција за блокот да го зајакне сопствениот капацитет за дејствување.


„Понепријателската безбедносна средина бара од нас да направиме квантен скок напред и да го зголемиме нашиот капацитет и подготвеност да дејствуваме, да ја зајакнеме нашата отпорност и да инвестираме повеќе и подобро во нашите одбранбени способности“, се вели во соопштението на ЕУ.


Централно место во планот е до 2025 година да се воспоставуват „ЕУ капацитети за брзо распоредување“ кои ќе имаат до 5.000 војници што би можеле да бидат испратени во непријателски средини.



Шолц најави 100 милијарди евра за војската и „нова ера“ за германската безбедност


Притисокот се зголеми за време на хаотичното повлекување на Западот од Авганистан минатата година, кога Европа увиде дека зависи од САД за евакуациите.


Стратегијата вели дека силите ќе имаат копнени, воздушни и поморски компоненти и би можеле да се користат „во различни фази од операцијата во недозволена средина, како што е почетен влез, засилување или како резервна сила за да се обезбеди излез“.


Лидерите на ЕУ кои се состанаа на самитот во Франција овој месец ветија дека значително ќе ги зголемат севкупните трошоци за одбрана како одговор на руската инвазија на Украина. Но, за новиот план немаше цврсти детали и беше посочено дека земјите на ЕУ само ќе „ги разменат националните цели за зголемени и подобрени трошоци за одбрана“ до средината на 2022 година.


Русија на 24 февруари започна инвазија на Украина, што е најголем напад на европска земја од Втората светска војна. Обединетите нации денеска соопштија дека Украина ја напуштиле 3,5 милиони луѓе.